„La forza del destino“ ei l’Opera Viva dil 2027

Amur, mort, uiara, fuigia, persecuziun e vendetga: quei ein ils temas dall’opera «La forza del destino» da Giuseppe Verdi. Suenter la presentaziun dad «Aida» igl onn 2025 ei Gion Gieri Tuor, il menader artistic dall’Opera Viva sedecidius da puspei presentar 2027 in’ovra da Giuseppe Verdi. «Jeu havevel gia pli ditg quell’ovra en truchet», di il dirigent che sefatschenta il proxim temps cun igl engaschament dallas solistas e dils solists. «Per mei eis ei ussa suenter che nus havein giu in fetg grond success cun ‹Aida› igl onn vargau, il dretg mument da vegnir cun ‹La forza del destino›.» Las numerusas cantaduras e cantadurs dil chor dall’Opera Viva ch’eran a radunonza ein pinai e dalla medema idea sco lur dirigent. Igl applaus a caschun dalla communicaziun alla radunonza generala ei en mintga cass staus gronds.

Adattada per la situaziun

«Buca tuttas ovras funcziuneschan en ina tenda sco quella dall’Opera Viva a Sursaissa», di il menader artistic. «Da per exempel vuler presentar in’ovra da Richard Wagner en ina tala tenda fuss strusch pusseivel. Wagner ston ins far enzanua auter.» Gion Gieri Tuor ha evaluau quellas operas che vegnan en damonda per la tribuna dall’Opera Viva. «La forza del destino» hagi fetg interessantas rollas solisticas ed era las parts pil chor seigien attractivas per cantaduras e cantadurs e pil publicum, di el. «Ina da nossas finamiras ei d’ir denter la glieud culla musica dallas grondas casas d’opera.

Carezia, odi e desperaziun

L’historia en quater acts che vegn raquintada ell’opera «La forza del destino» tracta d’ina carezia ch’ei scumandada. Ils fenomens crudeivels dall’uiara s’inscuntran cun l’historia d’amur da Leonora ed Alvaro. La pussonza dil destin semuossa en las midadas incrediblas dalla historia. Il siet nunvuliu d’Alvaro cura ch’el fiera naven sia arma e mazza cheutras il bab da sia carezada Leonora. Carlos, il frar da Leonora che vul far vendetga enviers igl assassin da siu bab, mo ch’enconuscha quel pér dil mument ch’el scuviera in maletg da Leonora en la tastga d’Alvaro. Carlos envida Alvaro al duel e quel ha liug precis sper la camona dils eremits nua che Leonora ha survegniu albiert. Carlos vegn tuccaus mortalmein dil duel. Leonora ed Alvaro s’entaupan, mo dil mument che Leonora s’avischina a siu frar Carlos, mazza quel cun sia davosa forza sia sora. Alvaro resta anavos sulets en desperaziun.

Ina tematica actuala

Gion Gieri Tuor fa allusiun all’actualitad dallas tematicas ell’opera La forza del destino. «Alvaro ei in jester derivonts dils Inkas dil Peru. El vegn ell’Europa e s’inamurescha en ina dunna indigena. Quei ei in fenomen che ha parallelas cul temps dad oz. Il secund fenomen ei la dramaturgia dall’uiara cun odi, vendetga, destrucziun e situaziuns incalculablas.» Quella historia hagi Giuseppe Verdi envestgiu en musica fantastica, di Gion Gieri Tuor.

Destin human

«La forza del destino» tracta, sco era las davosas operas a Sursaissa han tractau, il destin human. «Gie», di Gion Gieri Tuor, «Verdi sefatschenta en fetg biaras da sias cumposiziuns dalla situaziun dil carstgaun e dil destin human. Quei ei era aschia ellas numerusas ovras da Verdi che nus havein presentau ils davos 20 onns all’Opera Viva.» (mira box).

Suprastonza pli gronda

Als responsabels dall’Opera Viva eis ei suenter il giubileum da 20 onns e suenter diesch operas reussiu d’integrar il sponsoring cun duas novas persunas ella suprastonza dall’uniun Opera Viva. La radunonza ha elegiu Werner Egli da Platengia e Curdin Mark da Cuera sco novs suprastonts e menaders dil sponsoring. Omisdus novizs hagien ina fetg gronda reit da contacts, ha il president dall’uniun Kevin Brunold detg. Reelegiu ha la radunonza il president dall’uniun Kevin Brunold ed ils suprastonts Antonia Tschuor, Andreas Zuber, Günter Stegmaier e Gion Gieri Tuor.

Tgi succeda a Rudolf Mirer?

Plinavon ei vegniu dau enconuschent ch’ins vegni a presentar per 2027 in placat d’in niev artist. Suenter la mort dil pictur-artist Rudolf Mirer che ha furniu tut ils placats e maletgs da tribuna entochen 2025 all’Opera Viva, vegn ins proximamein a publicar ina concurrenza d’artistas ed artists per in niev placat per 2027. L’opera «La forza del destino» vegn presentada denter ils 30 da fenadur ed ils 14 d’uost 2027.