Vacanzas all inclusiv

Questa columna scriv jau sin in giaschaditsch a la riva da la Mar Cotschna en Egipta.

Quai tuna bain. Ma tut auter che planisà èn mias vacanzas all inclusiv. All inclusiv perquai che jau aveva era gia cudeschà inclusiv il curs da sfunsar. Ed jau aveva fatg l’emprima part dal curs avant ch’ina sgarschaivla tuss m’ha sfurzada da star sper enstagl en l’aua.

Per la paja hai jau era qua sin il giaschaditsch tut all inclusiv: WLAN a la splagia, inclus ils discurs che duas turistas talianas mainan via video cun confamigliars a chasa. U inclus ils rapports da famiglias ollandaisas co ch’els han martgadà tar la cumpra d’ina tastga falsifitgada.

Sch’ins ha la tuss, duai ins baiver bler. Per fortuna vegnan las bavrondas servidas er a la splagia. Il camarier vegn damai stediamain tar mai, sco era mintga minuta in auter animatur da l’hotel che ma vul motivar da far zumba, massaschas u turas da sfunsar – haha!

Mobain, i dat mender che da giaschair a la riva da la mar e n’avair da far nagut auter che leger e far passar il temp e la tuss. Jau stun anc diesch dis, enfin lura guarda mes pitschen mund ed il grond mund segir puspè ora auter.

Chatrina Josty-Kreuzer è pedagoga curativa e viva a Zuchwil en il chantun Soloturn.