«Dance Fun ei ina historia da success»

«Jeu haiel passentau circa la mesadad da mia veta cun Dance Fun», di Sonja Lombriser che ha 43 onns. «La fin ei per mei buc in stuer, mobein in astgar calar e surdar il project Dance Fun. Quel che funcziunescha aunc adina excellent e che vegn era menaus vinavon.» La decisiun da calar ha la mumma da famiglia che absolva actualmein ina scolaziun alla Scol’aulta pedagogica da Lucerna buca priu per star sin baun pegna egl avegnir. «Mintgaton ston ins calar cun enzatgei per ch’enzatgei niev hagi plaz e sappi crescher.» Dil ravugl familiar han ins udiu dil vulcan d’energia Sonja Lombriser ch’el hagi novs plans. Mo che quels plans seigien aunc plitost secrets, di ella sezza.

Saltau l’entira veta

«Jeu haiel entschiet a saltar cu jeu havevel quater onns», di Sonja Lombriser. «All’entschatta eran quei saults populars. Suenter hai jeu trenau patinadi artistic, fatg ballet, hip-hop, streetdance sco era saults da standard e saults latins.» Avon 22 onns cura ch’ella hagi entschiet cul Dance Fun a Rabius ed a Glion devi ei negina purschida da cuors da sault per affons a Glion e contuorn. «Quei ei stau il mument ch’jeu haiel decidiu da fundar la scola da sault Dance Fun. Jeu haiel denton maina fatg quei sco professiun, mobein adina sco hobi.»

Il svilup da Dance Fun

Dil 2004 entochen 2006 ha Sonja Lombriser purschiu exclusivamein Dance Fun per affons a Laax, Glion e Rabius. Naven da 2006 hai era dau cuors per giuvenils. «Cul temps havevel jeu aschi biaras gruppas, ch’jeu sun vegnida sill’idea, da far orda giuvenils en mias gruppas menadras e menaders. Quei ei stau in fetg impurtont pass: ils giuvenils savevan tgei ch’jeu spetgi dad els ed jeu savevel tgei ch’els san prestar. Aschia ha quella collaboraziun funcziunau fetg bien.» Tut las menadras e menaders dad oz seigien stai sco affons participontas e participonts dils cuors pli baul ni ch’ellas ed els seigien gia dapi biars onns menadras ni menaders el team, di la fundatura da Dance Fun. «Ins sa dir che Dance Fun ei ina historia da success.»

2300 affons e giuvenils

Plirs geniturs che han giu affons ils davos 22 onns han detg sin damonda dalla FMR che lur affons seigien era aunc stai el Dance Fun. Sonja Lombriser di ch’ella hagi instruiu ensemen cun 32 menadras e siat menaders en 15 loghens en tut pressapauc 2300 affons en 200 cuors da sault e 420 coreografias. «Per cumpletar quella biala statistica da 22 onns vuless jeu aunc aschuntar ch’jeu sun vegnida sin circa 3000 uras da sault. Tut quei fuss maina stau pusseivel, sch’jeu havess buc giu il sustegn da miu consort Marcus e da mes affons che han oz denter 12 e 23 onns», di Sonja Lombriser.

Engaschament ideal

Actualmein instruescha Sonja Lombriser sco assistenta da classa e sco menadra dallas structuras dil di extendida al Consorzi da scola Laax-Falera-Sagogn-Schluein. Dasperas porscha ella vinavon ils saults da FiMiX e FiMiX Family e Zumba sin basa privata. Ultra da quei ha Sonja Lombriser surpriu ina instrucziun en collaboraziun culla Pro Infirmis dil Grischun. «Cugl engaschament entochen dacheu haiel jeu saviu nuar biaras novas amicezias e far biaras experientschas positivas. Quei ei stau il pli impurtont per mei.» Alla damonda dalla FMR, sche quei engaschament intensiv sur 22 onns havessi buca meritau in premi ha Sonja Lombriser buca detg bia. «Sto esser che miu engaschament ei buca vegnius percepius ni ch’el ei buca digns da vegnir percepius. Quei dat ei era, sch’ins ha grond success e lavura ella stanza quieta.» Per ella seigi quei denton negin problem. Ella hagi survegniu gronda renconuschientscha da fetg biars affons e geniturs, e gliez seigi il principal.

Il futur

Sonja Lombriser surdat las proximas jamnas il tgamun da Dance Fun a sias successuras. Quellas vegnan a menar vinavon la purschida cun in auter num, mo dil tuttafatg el senn dalla fundatura. «Per mei eis ei impurtont da dir grazia a tut quellas e quels ch’ein s’engaschai ed han susteniu mei en favur da Dance Fun.»