Nauscha conscienza
Per cumenzar less jau far ina uschè numnà avertiment da trigger. I va per in tema violent e brutal. Per suppressiun, per unfrendas, per larmas, suaditsch e sang. I va per maternitad.
In’amia ha raquintà en noss chat da whatsapp ch’ella veglia ir sin in trip da weekend en ils culms. Ella dovria temp per sasezza. Probabel prendia ella cun sia figlia gronda. «Hä?», ha in’autra amia (senza uffants) respundì. «Pertge prendas cun tia figlia, sche ti dovras temp per tatezza?» Jau hai savì la resposta avant ch’ella ha respundì: «Nauscha conscienza.»
Jau enconusch quai numnadamain bain. Memia bain. La nauscha conscienza è mia cumpogna la pli fidaivla en mia vita sco mamma. Quai ha gia cumenzà durant la gravidanza: «Shit, dastg jau mangiar quai? Co era quai schon puspè cun il chaschiel? Hai jau ussa gia lavà la salata? Duas giadas? Ou, jau hai mal il chau, dastg jau prender in Ibuprofen? U meglier Dafalgan? Omg, fin cura dastg ins sgular? Ah, jau less ir ad in concert, u è quai forsa memia dad aut per il poppin?»
Gnanc da menziunar tut ils*las ginecolog*as cun lur dumondas e commentaris e normas. Tut questas controllas. Il «Nackenfaltentest», il test da diabetes, screening dad organs. «Ou, il pop è in pau grond, èsi forsa il zutger? Meglier mo pli mangiar products da graun entir. U eri idrats carbonics en general? Mann, quai duess jau bain savair!» E lura has ti la salata e ti cumenzas a leger e googlar, perquai che ti has il sentiment che ti stuessas savair tut questas chaussas.
Strusch ch’il pop è sin il mund vegni anc mender. Questa pitschna, nova vita. Ed uschè bler ch’ins po far fauss e tut*tas che san meglier: «Tge? Ti das gia in lulli? Pertge na funcziuna quai betg cun dar latg? Latg mamma è bain il meglier per l’uffant. Tgenina pulvra da latg dovras lura? Holle, Bimbosan, Aptamil, Hipp, Beba, Milupa …? Ui, la poppa bragia aber bler. Prenda toch ella en la tragi? Quai è il meglier per poppins. Memia bler en la tragi n’è betg bun, lura s’endisa ella memia fitg vidlonder e na dorma betg pli enta letg.»
Pli tard, cura ch’i va per la canorta, gira il carussel en il chau vinavant: «Ella è toch anc uschè pitschna! Lavur jau memia bler? Forsa manchent jau insatge? Ils uffants èn gea mo uschè curt pitschens. Jau na dastg betg lavurar dapli che 60 % cura ch’els èn uschè pitschens. Ma mia cassa da pensiun …!» E lura hai jau ina nauscha conscienza perquai ch’jau hai ina nauscha conscienza! Sco feminista e dunna emancipada stuessi bain esser pussibel da trametter l’uffant en canorta senza sa sentir mal.
Jau hai ditg pensà che quai chalia cura ch’ils uffants vegnan pli gronds. Ma questa speranza ha mia amia, che ha uffants pli vegls destruì: «Sch’jau survegniss mintga giada 5 raps cura ch’jau hai ina nauscha conscienza, lura pudess jau finanziar in trip a Vegas, enstagl si Sursaissa», ha ella scrit en noss chat. Constat. Ed jau pudess probabel finanziar mia pensiun.
Gust da leger dapli?