Il campadi da Siat svanescha

La populaziun da Siat ha para pauc plascher dalla plazza da campar a Curitg che sesanfla gest sur il vitg. Silmeins buca la pluralitad dalla populaziun ch’ei stada presenta ad ina sera da discussiun l’entschatta fevrer 2026. Ina sentupada organisada dil representant da Siat el parlament communal, Elias Casanova. «Nus havein fatg ina votaziun consultativa e duas tiarzas dils presents ein stai dil meini che la plazza da campar duei svanir.» Pli bugen oz che damaun, sco quei che Elias Casanova ha explicau viers la FMR. En ina brev drizzada alla vischnaunca da Glion ha il parlamentari formulau las resalvas viers la plazza da campar ch’ein vegnidas ord il ravugl dallas bia bein 30 persunas stadas presentas alla sera da discussiun il fevrer vargau.

Dabia malaveglia

En quella brev san ins leger ch’il campadi a Siat seigi vegnius erigius duront ils onns da corona. Quei per dar damogn al «hype» da campar sereghegliaus en Svizra, perquei ch’igl ei per temps buca stau pusseivel da far vacanzas egl exteriur. Per metter a disposiziun in indrez sanitar mudest ha la vischnaunca plazzau agl ur dil plaz in aschinumnau compotoi. «Deplorablamein ei igl interess da campar carschius ad in crescher, pli probabel perquei che la purschida ei gratuita.» Ella brev alla vischnaunca vegn denter auter fatg attent ch’ils campaders tegnien buc uorden. «Seigi quei cun dismetter rumians egl uaul ni far ils basegns ella natira.»  E quitaus fa era l’observaziun ch’ei vegni mintgaton fatg fiug agl ur digl uaul e ch’ils autos da campar tscherchien ulteriur plaz per liung da diversas vias da meglieraziun enaquella ch’il campadi seigi occupaus. «Vinavon ei vegniu fatg stem ch’ils autos da campar svidan lur tancs cun l’aua tschuffa els molocs da rumien ni svidan els ella tualetta publica. «Quei caschuna ina gronda purtgaria e malemperneivladads da schubergiar.» La quintessenza formulada ella brev ei clara. «La mentalitad dil pievel da campar sustegn ni nossa stizun dil vitg ni las ustrias, il campadi porta nuot auter che malemperneivladads e dagrettas.» Ella brev vegn schizun fatg allusiun ch’il campadi seigi vegnius installaus senza las lubientschas necessarias e seigi perquei illegals.

La vischnaunca ha capientscha

La reproscha dalla illegalitad vul il vicepresident dalla vischnaunca da Glion, Martin Capeder, buca schar valer. «Il campadi ei lubius sin fundament dad ina lubientscha movibla che vegn prolungida onn per onn.» Il vicepresident conceda denton che la suprastonza communala hagi capientscha per las resalvas dalla populaziun da Siat e vegni per quei motiv a serrar il campadi a Curitg. «Nus havein giu in semegliont indrez a Fontanivas che nus havein medemamein stuiu serrar.» Martin Capeder ei dil meini ch’il problem da campar vegni buca semplamein a svanir a Siat cun serrar il campadi. «Pli probabel vegn el semplamein stuschaus in pèr meters sin il parcadi public ella vischinonza.» Da quei meini ei era igl autur dalla brev drizzada alla vischnaunca che pretenda da stizzar sche pusseivel il liug da campar sin las applicaziuns che indicheschan ils loghens da campar e che la polizia communala fetschi, silmeins ils emprems meins, dapli controllas.

Valur turistica

Alla sentupada dalla entschatta fevrer ha ei denton era dau vuschs che han plidau a favur dil campadi pervia digl interess turistic. Quei fatg conceda era Elias Casanova che fa attent che quellas vuschs hagien pretendiu ch’ei fussi prudent da baghegiar ora il campadi en fuorma legala, pintga e schubra. In’idea ch’anfla era ina certa simpatia tier la vischnaunca, sco quei che Martin Capeder tradescha. «Enteifer la planisaziun locala havein nus previu da scaffir en quei liug ina zona da campar.» Era sch’il campadi actual vegn proximamein serraus vul la vischnaunca schar la zona da campar ella proposta per la planisaziun locala nova. Per cass ch’ins vuless pli tard tuttina scaffir en quei liug ina plazza da campar. Igl interess per campar a Siat para dad esser avon maun, silmeins tier las persunas sin via cun la rulotta.