Andiast porscha buns cussegls alla spusa

«Ina ni l’autra da mias amitgas ein stadas dapli che surstadas da mia idea.» Quei gi Sonja Killias che ha l’entschatta fevrer 2026 etabliu ad Andiast ina nova ed en Surselva unica purschida. Sonja Killias venda ni lai a tscheins vestgius da nozzas. Denton buca mo, ella porscha sut il num «Muments per la spusa» era cussegliaziun che surpassa l’elecziun dil vestgiu adattau. Dall’idea da fatschenta ei igl ambient da Sonja Killias staus meins surstaus; dapli denton ch’ella ha, sper siu liug da domicil a Fischbach-Göslikon el cantun Argovia, eligiu Andiast sco secunda dimora da fatschenta. Buca perquei che Andiast fuss gest in center economic en Surselva ni che la quota da maridar fuss surproporziunalmein aulta en quei vitg cun biebein 250 habitontas e habitonts. Sonja Killias ha fermas ragischs familiaras ad Andiast.

Aspects pli emperneivels

«Miu bab ei carschius si cheu ad Andiast ed jeu hai passentau in bien ton da mia affonza en quei vitg.» Denter auter ella ustria Killias che l’onda ha menau duront biars onns. Il Chalet Sofia, nua che Sonja Killias ei secasada e nua ch’ella porscha cussegl e vestgiu, ha il bab gia cumprau ils onns 70 sco quei che la feglia tradescha. La gliesta da scolaziun da Sonja Killias el sectur dalla formaziun psicosociala ei liunga. «Entras mia cussegliaziun per ils responsabels per la protecziun dad affons e carschi (KESB), sun jeu era sefatschentada cun la vart meins emperneivla dalla veta.» In dils motivs per Sonja Killias da sevolver professiunalmein ad aspects dalla veta empau pli emperneivels. «Bials vestgius da nozzas han gia adina fascinau mei.» Igl aspect psicologic da tschercar quei bi vestgiu lai la cussegliadra tuttina buca dil tuttafatg dalla vart. «Las dunnas giuvnas ein ozilgi sut pressiun pervia da lur cumparsa.» Sonja Killias fa attent che las interpresas che vendan vestgius da nozzas fan reclama cun models cun in tgierp optimal. «Jeu vi svegliar en mias clientas il sentiment ch’ellas seigien sco ils models dad ina unica attractivitad.» Francar il sentiment dad esser segiras da sesezzas, quei vul Sonja Killias. «Mintga spusa duei saver ch’ella ei dad unica bellezia quei gi da nozzas.» Ed il vestgiu da nozzas adattau ei il sustegn leutier. «Secapescha ch’ins sa tier mei era mo empruar en in vestgiu da nozzas senza ulteriurs cussegls.» Entochen 150 differents vestgius da nozzas ha Sonja Killias daferton arcunau. «Jeu sun stedi sin viadi cun vestgius dalla Argovia en Surselva ed anavos.»

Empremas clientas

Empremas clientas sursilvanas ha Sonja Killia gia beneventau ad Andiast. Clientas che ha anflau via ad Andiast tier la cussegliadra via Instagram. Ellas vegnan beneventadas el Chalet Sofia che ha gia sez ina historia da 170 onns, cun in puschegn vid meisa decorada. «Las spusas vegnan per regla buca persulas tier mei.» Ina amitga, ina sora, la meinaspusa ni era la mumma accumpogna la spusa alla tscherca dil vestgiu ideal. Sonja Killias fa reclama per Andiast e la Surselva sco liug original, ruasseivel, adattaus per seretrer dalla hectica dalla Bassa. In liug ideal per spusas da sefatschentar da rudien cul vestgiu da nozzas. «Ei fuss secapescha bi sche jeu vegness da carmalar spusas dalla Bassa da vegnir ad Andiast.» Per ina retratga dad in ni forsa dus gis ad Andiast ni ella vischinonza. Sonja Killias ei sezza spanegiada sche siu model da fatschenta anfla adherentas. Adherents sto ella denton buc anflar, ils basegns dil spus vegnan numnadamein buca plidentai aschia ch’igl ei aunc da sclarir nua e co il spus envestgescha.