«Forsa essan nus memia pulitas magari»

La stad vargada ei il Team Surselva da dunnas ascendius dalla 4. ella 3. ligia. La promoziun ei reussida suenter ina fetg buna stagiun. Ella 3. ligia ha l’equipa allura fitgau beinspert pei. Dils endisch giugs digl atun ha ella gudignau sis, ha fatg dus remis e spiars sulettamein treis. La runda da primavera ha allura entschiet avon strusch duas jamnas cun ina victoria encunter Gossau. La fin dall’jamna vargada ei lu suandau ina terrada ordeifer encunter Münchwilen. Dumengia proxima retscheiva il Team Surselva la squadra da Widnau allas 14.00 silla plazza da ballapei a Tavanasa/Mutteins.

In sacados plein experientscha

Parallelamein culla promoziun ella 3. ligia ha il Team Surselva da dunnas saviu serinforzar cun Anja Furger (30). La Lumneziana ch’ei carschida si a Cumbel ha giugau plirs onns ell’emprema equipa dil Club da ballapei Lucerna ella pli aulta ligia svizra dallas dunnas, la Women’s Super League. Cun Lucerna ha ella era gudignau il Cup svizzer igl onn 2021. L’entschatta 2024 eis ella seretratga dil ballapei activ. Ella vegn pia cun in sacados plein experientscha dil ballapei da dunnas ella squadra sursilvana. «Jeu sun s’integrada bein ell’equipa e sesentel propi bein. Il plascher da dar ballapei ei returnaus. Cheu sai jeu dar senza squetsch, schegie ch’jeu sun aunc adina nervusa avon mintga giug.» Anja Furger ei returnada ella regiun per differents motivs. Dapi entgins meins lavura ella sco redactura tier RTR. «En sesez level jeu adina returnar en mia patria. Cheu hai jeu mia famiglia ed il sulegl. Cu ins ei carschius si ellas muntognas fan ins vess da viver ella tschaghera dalla Bassa. Jeu sun era pli motivada cura ch’ei dat sulegl», di Anja Furger che ha terminau dacuort sia lavur da master en etnologia.

«Jeu emprovel da dar sustegn»

«Jeu enconuschevel insumma buc il nivel dalla 3. ligia. Suenter la runda digl atun hai jeu denton saviu constatar che nus setenin bein sin quei nivel», di l’attaccadra Anja Furger. Che la squadra fetschi buna pareta sin quei nivel hagi ella denton era mussau el Cup grischun ed aschia contonschiu il final che ha liug d’Anceinza. «Jeu hai il sentiment ch’ei tunschess era da dar cun quell’equipa ella 2. ligia. Tenor miu manegiar eis ei il mument denton meglier da mussar bunas prestaziuns ella 3. ligia ed empruar da setener leu denter las meglieras equipas», manegia Anja Furger. Sin fundament da si’experientscha emprovi ella da sustener il team da trenaders: «Jeu emprovel da far quei en ina fuorma constructiva ed en in tun positiv.» Ella hagi fatg sias experientschas el ballapei ed emprovi d’intermediar quellas. «Il team consista da biaras giugaduras giuvnas che ston rimnar savida. Leutier s’auda era il squetsch, per exempel da sittar in penalti inaga», di la Lumneziana.

Trenadra dallas junioras

Sia savida metta ella a disposiziun il mument sco trenadra-gidontra dil team da junioras FF-17. Per saver far quei ha ella era frequentau in cuors d’introducziun sco trenadra. «Jeu hai plascher da saver mussar da dar ballapei e co semigliurar», di Anja Furger. El team dallas activas vesa ella aunc empau potenzial ella tactica. «Jeu patratgel per exempel vid far pressiun el giug. Sch’ins ha mai empriu quei, sch’ei quei grev. Lu hai jeu magari era l’impressiun che nus seigien memia pulitas cun nossas adversarias», constatescha Anja Furger. Il tierz plaz actual ella tabella dalla gruppa 1 dalla 3. ligia muossa ch’il Team Surselva da dunnas ei sin ina buna via. Il segl ella 3. ligia ei reussius e forsa ch’ei suonda ils proxims onns aunc in ulteriur ensiviars.