«Mia fegnameira è da far anc 15 puncts»
Cun 8 puncts da diesch gis è igl CB Surses actualmaintg rango ainten la sagonda mesadad dalla tabella. Chegl vot deir tgi ainten la runda d’aton 2025 ò l’equipa tot oter tgi persvadia. Tge spetga igl trenader Flurin Demarmels ainten la runda da premaveira dalla sia equipa?
Sonda passada ò igl CB Surses giuia igl sies dieschavel gi digl campiunadi 2025/26 dalla gruppa 1 ainten la 4. liga. Cun Schlarigna ò la squadra da Flurin Demarmels retschet a Tinizong egn digls ferms teams ed en concurrent tg’ò anfignen ossa fatg gist 14 puncts daple tgi igl CB Surses. Digl reminent on igls Engiadines betg anc pers en gi aint igl campiunadi actual, chegl tgi vala er pigl magnatabella Panadoz. Agl CB Surses è reuschia anfignen ossa da gudagner angal dus gis, da giuier dus paris, persiva da perder gist seis parteidas. Damai ena bilantscha pitost negativa.
«Ia spetg ena clera reacziun»
Flurin Demarmels ò detg anvers la FMR tgi ainten la runda d’aton vegia igl CB Surses giuia per bler betg chegl tg’el veva spitgia. Ins vegia giuia gliunsch dasperas las abilitads e pussebladads tg’ins vess gia. Igl trenader dei: «Ia spetg ena clera reacziun e chegl dall’antiera equipa e da mintga giuieder singul». Chegl scu reacziun digls gis debels e mediochers ainten la runda d’aton.
Flurin Demarmels canoscha la qualitad dalla squadra ed er digls giuieders, en masditg da giuieders rutinos e giuieders giovens e cun ambiziuns e qualitads da manar igl team anavos tigl success. El seia cuntaint tg’ena gronda part digls giuieders seia sa revigneida da las blessuras, er schi l’egn u l’oter seia betg anc digl tottafatg fit e gueria. Actualmaintg vegia el a disposiziun en cader da 26 giuieders, en fatg plaschevel.
Transfurmar las schanzas an gols
Aint igl gi Surses – Schlarigna da sonda passada è sa musso tgi igls giuieders giovens e protagonists digl avigneir tigl CB Surses èn mutivos ed er pronts da surpiglier responsabladad. Els seian er chels tgi mantgaintan darar igl trenamaint e dastgan uscheia chintar cun la nominaziun per en gi. A parteir dalla proxima emda vigna puspe treno dus gedas l’emda e betg scu anfignen ossa igls davos treis meis en’eda l’emda. Flurin Demarmels punctuescha igl suandont: «Mia fegnameira è da far ainten la runda da premaveira 15 puncts.» Constato vegia el adegna puspe tgi agl CB Surses gartegia betg da far ple pressiun vers anavant, chegl tgi dovra per gudagner en gi e per far gols. Cò vei el anc en grond potenzial da migliurar chella realitad. Ena deblezza dall’equipa seia er da transfurmar las numerousas schanzas an gols e da nizigier migler las pussebladads davant igl gol digl adversari.
Da far puncts ò igl CB Surses gio sonda proxima la caschung e chegl cunter Bregaglia a Vicosoprana allas 17.00.
Gust da leger dapli?