Promoziun turistica da minieras sur cunfin

In Engiadina as cugnuoscha las minieras da S-charl ingio chi gniva chavà argient e sül Munt Buffalora illa Val Müstair, ingio chi gniva chavà fier. Eir illa Lombardia dà quai talas minieras chi sun accessiblas al public. L’idea es uossa da collavurar cun l’Italia e promouver las minieras turisticamaing sur cunfin.

Minieras da passa 700 ons

Las minieras in Svizra sun passa 700 ons veglias. In quellas gniva chavà argient o fier. La Regiun Engiadina Bassa Val Müstair vuless uossa promouver turisticamaing daplü quellas e chattar üna collavuraziun cun las minieras in vicinanza da Milan illa Valsassina, pacs kilometers davent dal cunfin svizzer.

Previs sun differentas pussibiltats da collavuraziun. D’üna vart es l’idea da scolar las guidas per far in avegnir turs tras ils sistems suotterrans, da tschella vart vulessan els eir realisar ün film tridimensiunal per persunas chi nu pon ir a pè aint illas minieras o chi vulessan far l’experienza digitala. Important saja eir dad elavurar ün concept da sgürezza per ir illa profuondità da la muntogna. Arno Kirchen, il manader da la Regiun Engiadina Bassa Val Müstair, ha spiegà invers RTR: «I nu da per exaimpel ün standard pel cumportamaint illas minieras», perquai saja previs dad elavurar ün concept da sgürezza insembel.

In Svizra ed in l’Italia

Sper dumondas da sgürezza e scolaziun da guidas es previs da realisar ün concept per promouver vieplü turisticamaing las minieras in Svizra ed in l’Italia. Arno Kirchen manaja cha la Valsassina es congualabla cun l’Engiadina. Turisticamaing ed eir per exaimpel in reguard da plazzas da lavur han els similas sfidas chi chaschunan sforz cumünaivels.

Il proget gnia a cuostar ardond 200 000 francs per la Svizra ed i saja previs da realisar il proget intercunfinar dürant ils prossems trais ans.