«Sun aun adina co e fetsch il miu»

«Mia barca» senumna la novissima ovra musicala da Pascal Gamboni, il musicist tuatschin, ina dallas fermas petgas dalla musica romontscha. Sil cover dil disc cumpact (DC) ha el scret: cantau, sunau, registrau, creau e semiau mez l’entira nova barca, che cumpara ils proxims gis. Cefras ein per Pascal Gamboni buca d’impurtonza, sco quei ch’el tradescha en ina dallas canzuns. «Ju mira sen miu pult, ina lavina da cefras, mo cun mia ghitara mein sen barcas ensiamen.» Per far in plascher alla FMR eis el tuttina spert seprofundaus ella statistica persunala. La barca ei il 14avel soloalbum da Pascal Gamboni. Sper tut quei ch’el ha gia mess a strada cun autras musicistas e musicists. La barca da Pascal Gamboni senoda gia dapi onns cun ferm tact da remar tras las undas musicalas. «Sun aun adina co e fetsch il miu, ju sun da buna fei.»

Bien per nus

Bien per nus che Pascal Gamboni ei da buna fei. Il niev DC cuntegn dudisch canzuns enramadas dil tact melodius dalla ghitara, il slang tuatschin da Pascal Gamboni ch’ei gia ton dacasa ell’ureglia romontscha. Denton ei Pascal era in poet e muossa ina gada dapli co sias remas van a prau cun sias melodias. «Mettel memez el tschiel, ed  il tschiel ella tiara e la tiara el pass ed il pass ell’aria.» Pascal Gamboni gi ch’el anfli sia inspiraziun ella veta, el si e giu dil mintgagi. «Quei sveglia en mei il desideri da scaffir novas canzuns.» Edir las canzuns ei ozilgi empau cumplicau, sco quei ch’il musicist conceda sez. Igl ei da saltar sin pliras nozzas e l’ovra sto natiralmein fitgar pei ella reit. Pascal Gamboni porscha sia barca nova era sin DC, sin platta fonografica e da niev era sin cassetta. «La cassetta ei empau in experiment.»

Mo per vegnir sin ina frastga verda sco musicist eis ei da sepresentar sin tribuna. «Quei fetsch jeu secapescha era stedi e fetg bugen.» Il contact cul publicum ei per el impurtonts per sentir nua ch’el sesanfla, nua ch’el stat cun siu repertori. Da cuminonza cun Valeria Zangger alla battaria e Res Coray al bass ei s’etablida sin tribuna ina formaziun empau da siemi che s’accordescha per plascher dil publicum meglier e meglier.

Digl evergreen alla nova canzun

Las canzuns da Pascal Gamboni ein gia fermamein ragischadas ella cultura romontscha. Da quei ha el gia fatg stem sez, per exempel igl onn vargau sin tura cun «Ils Passiunai» ensemen cun Curdin Brugger. «Unics», ni «Miu de», ni era «Paul» valan gia sco evergreens dalla musica romontscha ed ein aunc adina ina impurtonta part dil repertori da concert da Pascal Gamboni.

Con lunsch che las canzuns da «Mia barca» anflan in plaz stabel tiegl auditori vegn a semussar. Potenzial han ellas en scadin cass, sco per exempel «Ina nibla el tschiel» nua che Pascal Gamboni tradescha: «Durmir ho fatg begn, la peisa è uss naven, oz fetschu mo quei tg’ju less, il mund va’ju bugen.» Bi dad udir e bi da cantar cun el, sco era la canzun «La celebraziun»: «Mettel memez el flum ed il flum ella mar e la mar ella nibla e la nibla el graun. Mettel il graun el paun ed il paun el vianter ed il vianter el cor ed il cor en te.»