Lectura Rumantscha

«Hello, it’s me» – La Lectura Rumantscha è oz in pau internaziunala.

Prest sco en l’Australia

Jau ma regord anc bain, cura che jau hai cumprà mes emprim smartphone, avant var dudesch onns circa. Avant aveva jau anc in ord la vista dad oz «primitiv» Nokia, nua ch’ins stueva sa limitar cun scriver – e fotografar na gieva insumma betg! Damai: Dapi ch’il smartphone è part da mia vita, deploresch jau magari co ch’el ha attratg pli e pli fitg mia attenziun e lavagà mia concentraziun. Basta – quest excurs persunal en stil d’apostel da morala è atgnamain mo l’introducziun per la tematica che vegn discutada questa emna en il Cussegl grond. Sco en l’Australia duai il telefonin vegnir bandischà or da las stanzas da la scola grischuna, pretenda il deputà verd-liberal Walter von Ballmoos. El vul ina soluziun chantunala, però la Regenza s’oppona.

Il paiass american

«Trump ei il clown suprem, in paiass da num e pum.» – Stos ti tranteren era magunar las pulaccas e pulentas ch’il president american lascha ora di per di? Sch’el na fiss betg ina persuna cun ina reala pussanza che po destruir ina massa, suttascrivess jau immediatamain il citat da Hubert Giger: Tge «clown suprem» ch’el è, propi! Ils patratgs en la columna da Hubert Giger cundivid jau tschient per tschient: Era jau chat musicists e musicistas americans grondius – saja quai Ray Charles, Elvis Presley u anc ina massa massa auters. E da l’autra vart dal spectrum american è la politica actuala cun: «ti-sas-schon-tgi-che-jau-manegel».

A revair e bun divertiment cun la Lectura Rumantscha!