Quatter partidas van en il cumbat

Po la PLD salvar sia predominanza en il Surses ed a Bravuogn? Ils 14 da zercladur elegia il Grischun il Cussegl grond. Lura sa decida, sche la PLD po trametter era en la proxima legislatura ses deputads a Cuira. La concurrenza na dorma en mintga cas betg.

Trais ulteriuras partidas han numnadamain mess si candidats ed ina candidata che porschan cun lur differentas clamadas ina schelta captivanta als electurs ed a las electuras. Las elecziuns dal Cussegl grond empermettan uschia ina pulita tensiun en ils circuls da Surses e Bravuogn.

In chala, l’auter less cuntinuar

Il sez dal Surses è occupà da preschent cun Fabio Luzio da la PLD. L’electroinstallatur less politisar vinavant en il Cussegl grond e candidescha per la proxima legislatura. Per il deputà na vai dal reminent betg mo per in simpel sez parlamentar. Fabio Luzio ha era buns aspects da daventar l’avust il pli aut Grischun.

Dapi l’avust passà è il deputà da Cunter vicepresident dal Cussegl grond. Il vice vegn per il solit tschernì sco president suenter in onn. Ma avant che Fabio Luzio po recaltgar quest mandat, sto el anc ir en il cumbat electoral. I sto pir anc sa mussar, sch’ils Sursetters e las Sursettras al vulan propi trametter vinavant en il parlament chantunal.

Il sez da Bravuogn è occupà actualmain cun Felix Schutz. Il deputà da la PLD, che represchenta dapi 12 onns ses circul, chala cun questa legislatura da far politica sin livel chantunal.

Via libra a Bravuogn

Il sez da Bravuogn vegn pia liber e la cursa è averta. La PLD less defender il sez cun Jürg Hanselmann. Sin las glistas d’elecziun inditgescha el «administratur da facultad» sco clamada e Filisur sco domicil.

Medemamain a Filisur abitescha Seraina Schutz. Ella è la suletta dunna che candidescha en ils dus circuls dal Grischun Central. La politica n’è nagut ester per la candidata da la PS. Ella inditgescha numnadamain «manadra da projects politics» sco clamada. Per il Center va Urs Fliri en il cumbat. Il selvicultur abitescha a Latsch sur Bravuogn. El è manader da revier per ils guauds dad Alvra ed era la persuna da contact per dumondas dal guaud a Surava e Casti.

Il quart candidat batta per la PPS ed è Martin Heiz. Sco clamada inditgescha el guardiachamona e sco domicil Bravuogn. Ma là na l’inscuntran ins betg blers mais. La gronda part da l’onn passenta el en la chamona da Kesch che n’è betg mo averta la stad, mabain era plirs mais durant l’enviern.

Ils trais concurrents en il Surses

En il Surses lessen sper Fabio Luzio anc trais ulteriurs umens conquistar il sez. Era qua sa tracti puncto clamadas dals candidats d’ina schelta cun gronda variaziun. La PPS trametta Ignaz ­Netzer en il cumbat. El abitescha a Cunter e lavura sco emploià da la posta e da las pendicularas.

En ina tut autra sparta lavura Adrian Ballat da Savognin che less conquistar per la PS il sez. El è magister da snowboard ed assistent da giuvenils. Per il Center candidescha Marcel Züger da Salouf. Il biolog ha dal reminent gia pli baud ina giada politisà en in parlament, numnadamain dal 1999 fin il 2003 en il chantun Argovia. Lezza giada per la PS.

Vuschs da partida il 2022

La cursa electorala è pia lantschada. Betg mo a Bravuogn, nua ch’il sez vegn liber, datti in cumbat plain tensiun, mabain era en il Surses. Gliez mussa in sguard sin las vuschs da partida dal 2022 da quel circul: La PLD aveva cuntanschì 304 vuschs, il Center 293 vuschs, la PS e la Verda 124 vuschs e la PPS 57 vuschs. La PLD ha pia victorisà be per paucas vuschs en il Surses.

En il circul da Bravuogn èn las vuschs stadas repartidas avant quatter onns uschia: La PLD ha cuntanschì 117 vuschs, la PS e la Verda 85 vuschs, il Center 65 e la PPS 33 vuschs.