Dezonaziuns e mafiosis

Prest èsi elecziuns – gliez è stà da sentir en questa sessiun d’avrigl. Sa profilar è stada la devisa quest’emna en il Cussegl grond. Deputads e deputadas, che vulan puspè vegnir reelegids il zercladur, han empruvà da gudagnar l’attenziun. Igl ha perquai dà in u l’auter votum dapli che uschiglio ed era l’ura da dumondas da la gievgia è stada bler pli lunga che uschiglio.

Tar 17 temas han ils parlamentaris giavischà pled e fatg, per exempel davart mafiosis che han survegnì permissiuns da dimora en il Mesauc e davart dezonaziuns che na fissan forsa gnanc pli necessarias.

Vischnancas ston argumentar stringent

Malgrà mancanza dad abitaziuns stoppia il Grischun dezonar terren, ha constatà Reto Crameri dal Center. L’onn passà sajan vegnidas publitgadas novas cifras dal svilup da la populaziun. Quellas mussian che la populaziun creschia en tschertas vischnancas pli fitg che pensà cura ch’ins haja decidì las dezonaziuns. Il deputà dad Alvaschagn ha perquai vulì savair, tge consequenzas che las novas cifras hajan per las dezonaziuns.

«La mancanza d’abitaziuns n’è betg il medem sco la stgarsezza da terren da bajegiar», ha respundì cusseglier guvernativ Marcus Caduff. Il Grischun haja da principi avunda terren da bajegiar, era suenter las dezonaziuns planisadas. Il problem saja plitost la «mobilisaziun» da quest terren da bajegiar. Las vischnancas possian introducir in «obligatori da mobilisaziun» – pia l’obligaziun da stuair vender e surbajegiar las parcellas.

E tge vala per las vischnancas nua che la populaziun crescha uss pli fitg che pensà e ch’èn pertutgadas da dezonaziuns? Las vischnancas stoppian impunder mintgamai las cifras las pli actualas dal svilup da la populaziun per lur planisaziun, ha explitgà il cusseglier guvernativ. En pli stoppian ellas argumentar visavi il Chantun a moda stringenta e chapaivla, sch’ellas veglian dezonar damain terren.

Mafia – indizis èn vegnids memia tard

Ina autra dumonda è vegnida da Sandra Maissen dal Center. La deputada da Cuira ha vulì savair, pertge ch’il Chantun haja concedì permissiuns da dimora a mafiosis en il Mesauc. Il Tessin aveva tenor ella refusà da dar il dretg da dimora a questas persunas ed i haja dà indizis sin criminalitad.

Cusseglier guvernativ Peter Peyer è sa dustà per ses Uffizi da migraziun e dretg civil che ha concedì l’avust 2021 il dretg da dimora. Da lez temp n’aveva dà, sco ch’el ha ditg, naginas indicaziuns sin delicts da questas persunas (guarda LQ dals 2 d’avrigl). Pir l’onn 2022 haja il Tessin infurmà. Lura na saja quai betg pli stà pussaivel da retrair il dretg da dimora.

Burgais da stadis da la UE u da la EFTA hajan, sch’els adempleschan las premissas, il dretg da survegnir dimora en Svizra, ha ditg Peter Peyer. Pretender in extract dal register penal possian las autoritads be tar indizis concrets sin delicts. Da preschent examineschia il Chantun da pretender mintgamai ina uschenumnada «Selbstdeklaration» davart condemnaziuns u proceduras penalas pendentas da persunas che dumondian dimora.

Il 2027 ina sessiun en Val S. Pieder

Suenter l’ura da dumonda ha il Cussegl grond decidì che la sessiun dal zercladur 2027 haja lieu en Val S. Pieder.