Peter Peyer perda la pazienza
33 intervenziuns èn stadas sin il program, circa ina terza è il Cussegl grond vegnì da tractar en questa sessiun. Ina intervenziun ha pretendì dapli segirezza e controllas als cunfins grischuns. Il cusseglier guvernativ «responsabel» ha pers in pau la pazienza.
«Vus debattais en il fauss parlament», ha ditg Peter Peyer la gievgia en il Cussegl grond. «99 % da las chaussas che Vus crititgais, èn chaussa da la Confederaziun.» Il cusseglier guvernativ ch’è responsabel per la segirezza en il chantun è cunzunt sa drizzà a Gabriela Inauen-Menghini da la PPS, Michael Murizio da la PLD ed a Rico Lamprecht dal Center.
Els han pretendì che la Regenza fetschia dapli per impedir ch’il persunal da duana vegnia sminuì en il Grischun e per la segirezza en las valladas da cunfin sco la Bregaglia, il Puschlav e la Val Müstair.
«Berna s’empo, betg nus»
Dapi otg onns vegnian adina las medemas pretensiuns envers il Chantun, è sa vilentà Peter Peyer. «Jau enumeresch gugent ils fatgs sco ch’els èn, ed ins als po acceptar u betg.»
L’Uffizi federal da la duana e da la segirezza dals cunfins controlleschia als cunfins tut tenor situaziun e tenor ristgs, ha cità Peter Peyer las indicaziuns da la Confederaziun. Ina controlla senza foras dals lungs cunfins grischuns na saja betg pussaivla – e na saja anc mai stada pussaivla.
«Igl è vair, l’uffizi ha reducì persunal da duana. Quai è ina decisiun da la Confederaziun. Las vulps da spargnims a Berna, gliez n’essan betg nus», ha sutlingià il minister da segirezza. Cun il program da distgargia da la Confederaziun na possian ins betg excluder ulteriurs respargns a la duana. A Berna vegnia fatga la politica da persunal per la duana e betg en il Grischun.
«Quai èn las consequenzas da la politica federala», ha ditg Peter Peyer ed è sa drizzà als deputads ed a las deputadas: «Vus stuais ina giada discurrer sur da quai cun Voss parlamentaris federals a Berna che s’expriman trasora per respargns tar la Confederaziun.»
Assegnà intervenziun da Puschlavina
Malgrà il lavachau guvernamental ha il Cussegl grond assegnà cun 83 cunter 16 vuschs l’incumbensa da Gabriela Inauen-Menghini. La deputada dal Puschlav pretenda, che la Regenza sa dostia a moda pli decidida tar la Confederaziun per dapli segirezza als cunfins e per meglras controllas da duana.
Spustà «luv-tscharver»
La gievgia è la sessiun d’avrigl ida a fin. Da las passa trenta intervenziuns sin il program da la sessiun, ha il Cussegl grond tractà be circa in terz. Spustadas vegnan tranter auter las duas intervenziuns, sche dus lufs-tscherver dastgan vegnir mess ora en Surselva. Ina da quellas deriva da Gian Derungs dal Center, l’autra da la fracziun da la PPS.
Era il scumond da telefonins en scola vegn discutà en ina da las proximas sessiuns. Lezza incumbensa deriva da Walter von Ballmoos da la PVL (guarda LQ dals 22 d’avrigl 2026).
Gust da leger dapli?