Ils contacts cun Breil e Sedrun ein fetg impurtonts
La plazza da golf Sagogn-Schluein dil club Buna Vesta ha giu grevs emprems onns. Ella ha stuiu batter encunter il renum ch’ei seigi ina plazza memia pretensiusa. Suenter Pastgas 2026 ha la 18avla stagiun entschiet e la plazza ei occupada fetg bein. La FMR ha entupau il president dil club, Markus Diethelm da Laax. Sco quel declara ell’intervesta ei il menaschi oz etablius e las previstas pil 20avel anniversari positivas.
Ils 15 da matg 2026 vegnan commembras e commembers dil Club da golf Buna Vista Sagogn a s’entupar a Schluein alla 20avla radunonza generala cumbinada. Inagada eis ei la radunonza generala dalla societad-proprietaria digl implont, la Golf Sagogn-Schluein SA. Lu il medem mument la radunonza generala dil club cun ses dapresent 530 commembers. Alla davosa radunonza generala ha Christian Capaul surdau il presidi a siu successur Markus Diethelm. Suenter ch’el ha saviu surdar quella responsabladad, ha el astgau seconcentrar dapli sil giug ed ha promtamein saviu festivar ils 20 da settember 2026 la victoria al campiunadi dil club. Alla radunonza generala dils 15 da matg vegn siu successur Markus Diethelm a menar als duas radunonzas cumbinadas. Igl onn da gestiun 2025 ei stau in bien era en connex cullas finanzas. La societad ha saviu recaltgar in gudogn brut da biebein 900’000 francs. La FMR ha discurriu cul president niev da quei e da tschei da quei. L’emprema badelada dalla plazza Sagogn-Schluein ei stada il matg 2007, il medem mument era l’emprema radunonza dalla societad nova. Il fenadur 2008 ha il club saviu inaugurar la plazza ed il menaschi ha entschiet l’emprema stagiun.
Markus Diethelm, avon in onn han la radunonza dalla societad e quella dil club elegiu Vus sco successur da Christian Capaul el presidi dalla Golf Sagogn Schluein SA e dil club Buna Vista Sagogn. Tgei impressiuns haveis Vus gudignau en quei onn?
Markus Diethelm: Jeu stoi dir, ina impressiun fetg positiva. Nies club viva da commembers engaschai, collaboraturs motivai e d’ina gronda attaschonza alla regiun. Ins senta ch’ins ha investiu cheu bia passiu per la caussa – ton ella plazza sco ella veta dil club. Il medem mument hai jeu viu che nus havein aunc potenzial da sesviluppar senza piarder noss’atmosfera famigliara e persunala.
Suenter Pastgas ha la 18avla stagiun dil menaschi golf a Sagogn-Schluein entschiet. Tgei potenzial prendeis Vus en mira?
En emprema lingia vulein nus sviluppar vinavon il club da maniera persistenta, e quei ord vesta sportiva, per la veta sociala dil club sco era ord vesta economica. Nus vulein mantener sil medem ault livel l’attractivitad per nos commember. Vinavon vulein nus gudignar novas golfistas e novs golfists e rinforzar la purschida en connex cun turniers, la promoziun dalla giuventetgna ed era pertuccont la convivenza el club. Vinavon ves’jeu ch’igl ei impurtont da sviluppar vinavon la collaboraziun cun partenaris ella regiun.
Ils dus auters clubs en Surselva ein Vos partenaris?. Con impurtont ein quels contacts e partenadis?
Ils contacts cun Breil e Sedrun ein fetg impurtonts. Collaboraziun enstagl concurrenza ei ozildi la via dil success. Communablamein cul club da Breil e cun quel da Sedrun savein nus rinforzar nossa regiun sco destinaziun da golf, augmentar l’attractivitad da puschidas e trer a néz sinergias. Da quei profiteschan ils clubs, ils commembers e la finala era il turissem. Dil reminent ei era sesviluppai buns contacts ed in bien partenadi cul club da Domat.
La topografia da quellas quater plazzas sedifferenziescha. Vossa plazza vala sco fetg pretensiusa e sco sfida. Eis ei veramein schi pretensius da dar golf a Sagogn-Schluein?
Deplorablamein havein nus sez presentau el vargau nossa plazza mendra che quei ch’ella ei. Jeu less gi che la nossa ei pretensiusa, denton faira eis ella per tuts tuttina. Igl ei ina plazza che pretenda precisiun, patertgar tactic e concentraziun. Exact quei fa ch’ella ei interessanta e sedistingua dallas autras. Cheu san ins buca semplamein giugar silla lunghezia – ins sto leger la topografia dalla plazza e trer decisiuns prudentas co dar. Quei apprezieschan biaras golfistas e golfist fetg. Nus survegnin era biars compliments da visitaders. La plazza Sagogn-Schluein ha caracter, cun vials e ruosnas che laian anavos in’aulta valur positiva.
Ina tala plazza plazza da golf porscha pia era schanzas. Tgeininas veseis Vus per la plazza «Buna Vesta»?
La schanza da sesviluppar vinavon el giug – da semigliurar, d’emprender e da seperfecziunar. Tgi che dat cheu migliura la tecnica e la fermezia mentala. Il medem mument ei nossa plazza amiez ina cuntrada da bellezia – quei colligia la sfida sportiva cugl esser ella natira. Jeu vesel quei sco grond punct plus.
Dar golf ei ina disciplina sportiva classica dalla stad. L’aura ei denton ei pli e pli incalculabla. Co valeteis Vus il «partenadi» tier sogn Pieder?
L’aura ei effecitamein el sport da golf ina partenaria impurtonta – mintgaton ina emperneivla, mintgaton ina pretensiusa. Sche s. Pieder lai dar sulegl porta quei frequenzas e plascher dil giug. Plievgia pretenda perencunter flexibilitad. Denton gest en nossa regiun vivin nus culla natira. Biars golfists apprezieschan exact quell’experientscha sut tschiel aviert. Leutier havein nus il cletg dil microclima, nus profitein cheu a Sagogn-Schluein da relaziuns meteorologicas extraordinarias. L’aura cheu ei autra che a Flem per exempel, il funs dalla Foppa favorisescha la bun’aura.
Essas Vus dil reminent cuntents cul diember da commembers, ni savessas aunc duvrar daplirs?
Da principi essan nus cuntents, pil mument essan nus 530 commembembers. Mia finamira fuss da contonscher la cefra da 600. Per mintga club eis ei impurtont da haver novs commembers, pertgei quels portan impuls frestgs e garanteschan il futur. Jeu sun optimist e vesel in svilup positiv. Sin dapli che 600 commembers vulein nus denton buca crescher, autruisa pitescha la veta sociala dil club.
Vossa plazza ei vegnida inaugurada il fenadur 2008. Suenter prest 20 onns sa la societad Golf Sagogn-Schluein SA respectiv il club da golf Buna Vista Sagogn segir trer bilanza. Co vesa quella ora tenor Vus?
La bilanza generala ei fetg positiva. Igl ei gartegiau da sviluppar ella regiun in’ovra persistenta: in implont sportiv d’aulta qualitad, d’impurtonza pils contact socials e da plivalur turistica. Jeu sai ch’ei ha dau en quels 20 onns era sfidas e tempiastas. Denton igl ei decisiv ch’il club ei oz etablius e ch’el ei tschentaus sin ina basa solida.
Vus manegieis era la basa finanziala. Co sepresenta la bilanza all’entschatta dalla 18avla stagiun da menaschi?
Las cefras fan veramein buna speronza. Nus economischein da maniera responsabla e cun vesta sin in menaschi persistent. En in tal ch’ei dependents dalla stagiun, vul gir digl avrel tochen il november, drova ei adina in egl per la buna mesira. En general astgein nus esser cuntents cul resultat contonschiu. Quel mussa era che nus essan silla buna via. Ils 15 da matg, a nossa radunonza generala, vegn jeu a presentar las cefras.
Suenter biars onns ha ei dau ina midada ell’ustria dil club da golf. Co veseis Vus la collaboraziun culs ustiers novs Sascha Meyer ed Yvonne Marx?
L’ustria ei ina part impurtonta dil golf en general. Dar golf ei dapli che sport – igl ei il s’entupar e la veta sociala. Perquei ei la buna collaboraziun culs ustiers e lur hospitalitad in factur central. Jeu apprezieschel fetg il brat aviert cun els e sun perschuadius che nus savein porscher bia a nos commembers sco era als visitaders d’ordeifer il menaschi da golf.
In factur decisiv da Vossa plazza astg’ins buca emblidar: la squadra che tgira e cultivescha quella mintga gi. Il menader da quella, Kurt Deflorin, vegn pensiunaus la fin digl onn. El ei naven dall’entschatta el menaschi ed enconuscha quella plazza da golf sco negin auter. Haveis Vus gia reglau sia successiun?
Kurt Deflorin hat prestau duront tut quels onns excellenta lavur ed influenzau essenzialmein la qualitad dalla plazza. El mereta perquei grond engraziament e respect general. Sia savida ei effectivamein enorma. Il medem mument eis ei era nies pensum da planisar ad uras e cun quitau la midada. Negin ei remplazzabel in sin in, denton cun ina buna preparaziun, transfer dalla savida ed ina ferma squadra sundel jeu da buna speronza ch’ei gartegi da remplazzar il headgreenkeeper Kurt Deflorin.
Dapi 1989 a Laax
Markus Diethelm ei vegnius 1989 cun sia famiglia a Laax. El ei naschius 1963 a Brugg e carschius si a Riniken, in vitg ella vischinonza. Suenter las scolas obligatoricas ha el fatg in emprendissadi da stagner da maschinas ed ei sescolaus vinavon al tecnicum da Brugg-Winisch sco inschignier da maschinas cun accent en robotica ed automatisaziun. Gl’onn 1993 ha el fundau ensemen cun Reto Gurtner l’interpresa Mountain Vision SA. Igl ei ina firma associada alla Arena Alva che porscha survetschs d’informatica. Tochen la fin da 1997 ha el menau sez quella. Silsuenter ha el luvrau tier Oracle a Baden e da quella midau il 2005 tier Atos Origin nua ch’el ei aunc oz menader d’ina partiziun. Atos Origin ei ina gronda firma franzosa dil sectur d’informatica cun pli che 100’000 collaboraturas e collaboraturs. Ils dus affons da Markus Diethelm ein carschi si ed i a scola a Laax e discuoran romontsch. (fmr/abc)
Gust da leger dapli?