Dabia innovaziun da Rueun anora

La halla da producziun dalla interpresa Novaziun a Rueun ei buca fetg gronda. En in encarden ein gest tschun monotracs pli u meins montai a fin e beingleiti promts per surdar alla clientella. Il monotrac ei in impurtont product che la giuvna interpresa ha sviluppau da funs ensi. Ina maschina dad in ischel cun tracziun electrica che sa vegnir equipada cun differentas maschinas supplementaras adattadas per la lavur communala ed agrara. Segar praus e scarpas, schubergiar vias, rumir neiv ed aunc bia auter san ins cun quei vehichel.

«Il monotrac ei per il mument nies pli impurtont product.» Quei ha il confundatur da Novaziun Gian Caduff explicau il gliendisgis vargau a biebein 20 commembras e commembers dil Lions Club Surselva (mira era boxa). Il president dil club Otto Deplazes ha vuliu mussar a siu commembradi tgei che l’interpresa ch’el ha titulau per unica en Surselva presta.

Vasta purschida

Sper la construcziun dil monotrac porscha Novaziun denton dabia ulteriurs survetschs che cumpeglian la construcziun da maschinas, tecnica electronica entochen tier la software ch’ei buca meins impurtonta per ch’ils vehichels cun tracziuns electrica funcziuneschan. «Per exempel essan nus stai involvi ella construcziun dalla muntaniala», ha Gian Caduff declarau. Quella maschina ei vegnida sviluppada aposta per furar las ruosnas per ils sochels dallas meisas che portan ils panels da Sedrun Solar. «Per quella maschina havein nus planisau la part dalla construcziun purtadra.»

Gian Caduff ha era presentau al Lions Club Surselva ulteriuras soluziuns tecnicas ch’el e ses collaboraturs sviluppeschan per autras firmas ed interpresas. «Nus cussegliein, planisein e construin sin giavisch dalla entschatta dad in product entochen alla fin.» Gian Caduff ha dau d’entellir che biara tocca tecnica, ch’ei necessaria per realisar il product final, vegn producida tenor il plan da Novaziun per tut il mund entuorn. E biaras cumparts tecnicas vegnan ozilgi squitschadas, era en metal. Gian Caduff ha presentau entginas da quellas soluziuns tecnicas.

Concurrenza mundiala

Novaziun stat en concurrenza cun interpresas cun ina semeglionta purschida sigl entir mund. «Perquei eis ei senz’auter era pusseivel da luvrar da Rueun anora.» Innovativa sto l’interpresa esser e semplamein porscher megliers products e meglieras soluziuns che la concurrenza. E buns ed innovativs products vegnan da buns e motivai collaboraturs. «Nus havein ina sedia a Turitg, perquei che nus eran dil meini ch’ei seigi leu forsa pli sempel da recrutar persunal.» Dils 14 emploiai lavuran otg oz a Rueun. Nico Bernold ha fatg il pass cun sia famiglia da Turitg en Surselva e viva oz a Vuorz. Il specialist per electrotecnica e tecnologia d’informaziun creescha tenor basegns dalla clientella software che garantescha ch’igl indrez funcziuna.

Survigilonza da Rueun anora

Via laptop ha Nico Bernold demonstrau co ils monotracs gia en funcziun vegnan da Rueun anora survigilai per endriescher, sch’enzatgei va buc scosauda e sch’il possessur drova sustegn. Planisar e construir seigi sulet ina part dalla medaglia, gi Gian Caduff. «Nus stuein era porscher survetsch, sch’enzatgei va buc.» El ha fatg attent che sia equipa secumponi plitost da tecnichers. Dus vendiders lavuran oz per Novaziun en Svizra. «E proximamein entscheiva ina persuna responsabla per la reclama a luvrar tier nus.» Reclama vul Novaziun far sur il cunfin svizzer. «Ils embrugls actuals en connex cun igl ieli e benzin muossan che nus essan sin la dretga via», ei Gian Caduff perschuadius, era da Rueun anora.

Nico Bernold, Arno Spescha (en schanuglias), Otto Deplazes e Gian Caduff (da sen.) seposiziuneschan sper in dils monotracs prest fini. Foto Andreas Cadonau

Dus Lions Clubs en Surselva

Il Lions Club Surselva ei sper il Lions Club Origin dil Rein il secund club da Lions ch’ei dat en Surselva. Ils clubs ein part dad ina organisaziun internaziunala che s’engascha principalmein per il generalesser e per projects caritativs. Las commembras ed ils commembers s’entaupan duas ga per meins buca mo per star da cumpignia. Il president vegn mintgamai elegius per in onn. Sco quei ch’il president actual dil Lions Club Surselva Otto Deplazes gi, envidan ins per regla ina ni pliras persunas allas sentupadas meinsilas. Leu presentan quellas persunas lur activitads ni s’expriman davart temas actuals. «Magari cumbinein nus era nossa sentupada cun ina excursiun sco per exempel tier Novaziun a Rueun.» Regularmein sesprova il Lions Club Surselva da rimnar daners per sustener instituziuns che s’engaschan per il generalesser, per exempel il Museum Regiunal Surselva ni era la concurrenza da musica dalla Scola da musica Surselva. Igl onn vargau ha il Lions Club Surselva festivau siu 50avel onn d’existenza. «E dapi lu fan era las dunnas part a nies club e quei ei a nus fetg d’engrau», gi Otto Deplazes. (fmr/ac)