Capetschas pils sucs da fretgs

La finamira per la Pro Senectute svizra ei da producir 88’888 capetschas per metter sur il tgau giu allas butteglias dils sucs da fretgs dad Innocent. E mo per dir: 333 da quellas mini-capetschas vegnan dall’Uniun da dunnas Vinavon da Sumvitg. Barbara Candinas e Nicole Caderas sco suprastontas dalla Uniun da dunnas Vinavon han organisau l’acziun da far capetschas a Sumvitg. Barbara Candinas di ch’ella hagi scuviert l’historia da far capetschas a caschun d’in event da far caltschiel a Turitg. Suenter in emprem contact cun Curdin Casaulta dalla Pro Senectute Surselva hagien ella e sia collega Nicole Caderas presentau l’idea allas dunnas da Vinavon a Sumvitg. Dapi il december 2025 s’inscuntrien ver 15 dunnas regularmein ellas localitads digl anteriur biro da posta da Sumvitg per far caltschiel.

Project impurtont

Per Curdin Casaulta, il menader dalla Pro Senectute Surselva, ei l’acziun da far capetschas in impurtont project ella sparta dils projects da cuminonza dalla Pro Senectute svizra. «Igl aspect central ei che biaras persunas fan ina lavur communabla cun la medema finamira. Ad ellas savein nus cun quest’acziun engraziar che la Pro Senectute survegn 45 raps per mintga capetscha producida.» L’uniun da dunnas da Sumvitg hagi organisau lur acziun «Mach dich mützlich» a moda autonoma senza support dalla vart dalla Pro Senectute, di Curdin Casaulta. La davosa mesjamna sera ha el visitau las dunnas duront ina sera da far caltschiel a Sumvitg ed engraziau ad ellas per lur lavur. «Jeu haiel sentiu quella sera ch’ei regia in bi ed emperneivel spért da cuminonza ell’uniun da dunnas. Quei ha fatg impressiun a mi.»

Vinavon alla tscherca

Las coordinaturas dall’acziun a Sumvitg han detg ch’ellas e lur collegas dalla suprastonza seigien adina alla tscherca da novs projects. «Jeu creigel che nus hagien quella gada tuc la noda cul project da far capetschas», di Barbara Candinas. Las dunnas ch’ein stadas dalla partida quella sera che la FMR ei stada a Sumvitg han tuttas discurriu d’in project interessant cun in bien scopo ch’ei vali la peina da s’engaschar. Ellas han presentau capetschas en tuttas colurs, fatgas cun crutsch ni cullas savetschas da far caltschiel. Priu part dalla squadra da far caltschiel a Sumvitg han era las scolaras Alessia Cathomas che ha fatg sezza capetschas e Norina Cathomas che segida cun producir ed adossar las miseroclas per las capetschas.

L’acziun ei turnada

Gia ils onns denter 2011 e 2013 ha la Pro Senectute organisau ina acziun da far capetschas per l’interpresa Innocent. Sco quei che la Pro Senectute svizra scriva hagien las acziuns da lezzas uras cattau ina buna resonanza e purtau success. Perquei hagi ins igl onn vargau lantschau da niev l’acziun, quella gada cul motto «Mach dich mützlich». 333 capetschas vegnan ad esser ellas crunas dils distribuiders naven digl atun proxim derivan da Sumvitg.