Eleger giu ei pusseivel

Igl ei stau ina novitad derasada dad RTR ch’ins ha giu l’impressiun ch’ella vegni neu dad ina gasetta da tscheiver. La novitad pertucca la midada al tgamun dalla societad acziunara en possess dil Bogn Tenigia. Miez avrel 2026 annunzia il register da commerci via igl Fegl ufficial cantunal che Anton Meier surprendi da niev il presidi dil cussegl d’administraziun dalla Bogn Tenigia SA. El remplazzi al tgamun da quella societad acziunara Rolf Diefenbacher. Sin damonda dad RTR ha Rolf Diefenbacher getg da saver nuot da quella midada. El vesa sez aunc adina sco president legitim buca mo dalla societad acziunara, mobein era sco possessur dallas aczias ed en consequenza era dil Bogn Tenigia.

Sche tuts ein presents

Eis ei insumma pusseivel da midar ora in president dad in cussegl d’administraziun dad ina societad acziunara senza che quel sa enzatgei dalla caussa? Da principi gie, gi il notar ed advocat a Glion Remo Cahenzli, denton mo sut la premissa d’ina radunonza universala, nua che tuts acziunaris ston esser presents ni representai. Sche quei ei buc il cass, sa ina radunonza generala mo prender decisiuns valeivlas, sch’ella ei convocada conform alla lescha ed als statuts cun indicar las tractandas e las propostas dil cussegl d’administraziun. «La convocaziun ei per regla caussa dil cussegl d’administraziun, al qual il president fa part.»

Il giurist che sefatschenta era cul dretg da societads puntuescha da sez buc enconuscher la situaziun ed ils fatgs che pertuchien la Bogn Tenigia SA. Per registrar las mutaziuns el register da commerci concernent il cussegl d’administraziun tonschi ei da tarmetter agl Uffeci dil register da commerci il protocol dalla radunonza generala dalla societad acziunara che cuntegni la decisiun dalla mutaziun, suttascrets da persunas legitimadas. «Tier ina demissiun voluntaria ord il cussegl d’administraziun ei per regla avon maun ina demissiun a scret dil commember pertuccau.» Necessaria ei ina demissiun a scret denton buc, sco quei che Remo Cahenzli declara, «cunquei che la radunonza generala sa era renviar ina reelecziun d’in commember dil cussegl d’administraziun resp. dil president».

La societad d’aczias ei anonima

E tgi ch’ei acziunari dalla societad acziunaria sedat buc ord il register da commerci. «Ei sedat gia ord la definiziun ‹societad anonima› ch’igl acziunariat da tala ei buca publics ed era buc veseivels ord il register da commerci», gi Remo Cahenzli. Aschia ei la societad acziunara era buc obligada da publicar midadas egl acziunariat ni communicar quel al register da commerci. En quei punct sedifferenzieschi la societad anonima dil tuttafatg dalla societad cun responsabladad limitada (scrl ni GmbH), nua ch’ils proprietaris ein publicai el register da commerci, fa Remo Cahenzli a saver. «Tier la societad acziunaria eis ei caussa dil cussegl d’administraziun da menar il register digl acziunariat, vul dir il cudisch d’aczias.»

Enconuschent mo a caschun dalla fundaziun

Al register da commerci vegni igl acziunariat per regla mo enconuschents a caschun dalla fundaziun dalla societad acziunaria. El document da fundaziun ein d’indicar las persunas che segnan aczias il di da fundaziun (mira era boxa). En quei cass ston ils fundaturs dalla societad cumprovar ch’il capital d’aczias ei pagaus en e ch’ei vegn buca dau ora dapli aczias che capital signau. «Quellas indicaziuns ston esser documentadas dil notar avon ch’il register da commerci sa registrar e publicar la nova societad.» Remo Cahenzli fa attent ch’ei duvravi tochen la fin 2007 el minimum treis persunas per fundar ina societad acziunaria. «Tenor il dretg d’aczias vertent tonscha ina suletta persuna fundatura.»

Sche la situaziun dalla Bogn Tenigia SA pertuccond il possess dalla aczias ni la legitimitad dil tgamun dalla societad acziunara seigi buc clara, vegni la finala ina dertgira a stuer decider tgei che vali, manegia Remo Cahenzli. E gest tals pass giuridics ha il president ni buca pli president dalla Bogn Tenigia SA, Rolf Diefenbacher, gia annunziau viers RTR.

Antruras dus differents acziunaris

Entochen la fin 2019 enconuscheva il dretg d’aczias svizzer sper las aczias nominalas era aczias al purtader, sco quei che Remo Cahenzli declara. «Il possessur dall’aczia nominala sto esser registraus cul num ed adressa el cudisch d’aczias dalla societad, il possessur dall’aczia al purtader era magari gnanc enconuschents alla societad sezza, aschia che quel era diltut anonims.» L’aczia al purtader ei oz denton buca pli lubida, aschia che talas aczias ein muort lescha vegnidas midadas en aczias nominalas. Quei che ha saviu caschunar difficultads da menar il cudisch d’aczias, ton pli sch’ils possessurs dallas aczias al purtader eran gnanc enconuschents al cussegl d’administraziun. La Bogn Tenigia SA haveva tenor igl extract dil register da commerci denton buc ina categoria d’aczias al purtader. (fmr/ac)