La «Ela Energiewelt» è sa schliada

Il martgà saja sa midà, scriva la «Ela Energiewelt» en la communicaziun areguard sia schliaziun. L’economia privata surpiglia pli e pli savens las lavurs che l’uniun ha prestà ils ultims passa diesch onns (guarda box) per promover l’effizienza energetica en la regiun Surses e Val d’Alvra. E perquai haja la radunanza extraordinaria dals 13 d’avrigl 2026 schlià formalmain l’uniun: «L’incumbensa oriunda da la ‹Ela Energiewelt› è per gronda part ademplida», hai num en la communicaziun or dal ravugl dals purtaders da l’uniun.

Sa deditgar a novas sfidas

Sco che l’anteriur mainagestiun da la «Ela Energiewelt» Patric Vincenz ha ditg envers la FMR, saja la schliaziun da l’uniun gia stada l’onn passà in tema: «Il basegn da promover l’effizienza energetica datti anc adina. Ma cunquai che las interpresas han entant la savida necessaria e cunquai ch’er il Chantun fa grondas campagnas en quest sectur, na dovri betg pli ina tala uniun regiunala.» La finamira principala da sensibilisar ed infurmar consumentas e consuments pertutgant il construir en moda energeticamain effizienta, la mobilitad ed il consum d’energia haja l’uniun ademplì.

Tenor la communicaziun a las media vulan la Uffer SA ed il Parc Ela, las ultimas duas purtadras da tschep da l’uniun, dentant cuntinuar lur engaschi communabel cun sa deditgar a novas sfidas: l’economia circulara, il grad d’utilisaziun da materias primas e la rolla dal guaud per cumpensar CO₂. La facultad restanta da la «Ela Energiewelt» vegnia damai transferida a la fundaziun Pignaverde che s’engascha gia en quest sectur. Ils meds finanzials veglian ins alura impunder en projects communabels per promover il guaud da muntogna ed uschia proteger resursas regiunalas. Sco che Patric Vincenz ha confermà, na saja la facultad da la «Ela Energiewelt» dentant stada relativamain modesta, cunquai che l’uniun na saja betg pli s’engaschada ils ultims onns per recaltgar daners.