Plirs records al Städtlilauf
Il Städtlilauf a Glion ha giu quest onn in record da participonts e participontas. La sonda vargada ein ver 700 persunas curridas tras l’emprem marcau sper il Rein. In’acziun da solidaritad alla cuorsa ha fatg attent sin persunas che san pervia d’ina malsogna buca prender part all’occurrenza.
La sonda vargada ha giu liug el marcau da Glion il Städtlilauf. Ver 700 persunas ein separticipadas alla cuorsa populara. Quei seigi in record, sco il comité d’organisaziun scriva en sia communicaziun allas medias. Sper las cuorsas sur las distanzas da 6,6 e 13,2 kilometers ha ei era dau cuorsas per affons e da nordic walking.
Acziun da solidaritad
Il Städtlilauf lavura era cun Swiss Inclusive Sport ensemen e porscha ina categoria «for all» per persunas cun impediments. Era uonn seigi il plascher dils participonts staus da sentir specialmein, scrivan ils organisaturs. Plinavon ha ei era dau in’acziun en favur da pertuccai d’ina malsogna sco long-Covid ni il sindrom da fatigue ch’impedescha da menar in mintgadi usitau nundir da far part ad ina concurrenza da cuorer. Biara glieud hagi susteniu quell’acziun, scrivan ils organisaturs. Il team da l’acziun da solidaritad «Nus currin per quels che san buc» che l’ergoterapeuta Ramona Cathomas ha organisau ha schizun gudignau il classament d’equipa.
Sper il record da participaziun ha ei era dau sportivamein records. Jan Hafner ha tschentau si novs records ton ella cuorsa d’eliminaziun «7130» cun in temps da 22:17 minutas sco era sur 6,6 kilometers (quater miglias) cun 22:58 minutas. Tier las dunnas eis ei gartegiau ad Annika Vössing sur 13,2 kilometers (otg miglias) cun 51:53 minutas medemamein ina nova cuorsa da record.
Gust da leger dapli?