Ils auals èn battegiads

Ava da Cresta Stgoira, Ava da l’Era Viglia ed Ava da La Val èn trais dals novs nums geografics uffizials da Lantsch (guarda box). Sin proposta da la vischnanca ha la Cumissiun da nomenclatura chantunala registrà en tut 22 nums, per gronda part per auals. Sco ch’il president communal da Lantsch Simon Willi ha confermà envers la FMR, hajan ins fatg las propostas per motivs pragmatics: «Ils nums uffizials duvrain nus, sch’i dat per exempel in project da meglieraziun d’in aual. Lura èsi d’avantatg d’avair in num uffizial per inditgar ed identifitgar en moda correcta l’aual pertutgà.»

Las propostas per ils nums haja dal reminent la suprastanza communala fatg. «Quai èn tut nums gia existents che cunzunt puras e purs dovran gia en quella furma. Nus n’avain betg stuì far retschertgas per als chattar», ha il president communal explitgà e confermà che tut las propostas èn vegnidas approvadas.

Register chantunal

La Cumissiun da nomenclatura, che cumplettescha ed actualisescha sin proposta da las vischnancas il register da nums, fa part da la partiziun mesiraziun uffiziala da l’Uffizi d’agricultura e da geoinfurmaziun. Ella sa cumpona da sis commembers: Armin Oswald (president), Michele Badilatti, Thomas Gadmer, Fernando Iseppi, Ursin Lutz e Daniel Telli. Els controlleschan sch’ils nums proponids da las vischnancas èn linguisticamain corrects e fixeschan la scripziun.

Sch’ina vischnanca propona novs nums – sco quai ch’igl è apunta stà il cas a Lantsch – lura pretenda la cumissiun responsabla plinavant in plan per pudair identifitgar il territori u aual correspundent (guarda charta). Ils nums geografics da la partiziun mesiraziun uffiziala vegnan numnadamain duvrads tranter auter en il plan da basa dal Chantun.

Era las vias da guaud

Sco che Simon Willi ha explitgà, na saja la suprastanza communala dentant betg mo sa fatschentada cun nums d’auals e cultiras. A medem temps hajan ins numnadamain era cumplettà ils nums da las vias da guaud. Quels na ston ins però betg suttametter a las cumissiun da nomenclatura.