18 instruments per in tun niev

La gronda part dils instruments ein dalla marca Stomvi. Els vegnan produci a Xirivella, in marcau ella vischinonza da Valencia en Spagna e sedistinguan cun in tun ferm, rodund, lom ed equilibrau. Quei grazia al titan ch’ei el metal. Sunaduras e sunadurs dalla Societad da musica Danis-Tavanasa exerciteschan dapi il fevrer duas gadas ad jamna cun quels instruments novs. Il dirigent Toni Schuoler ed il president Ermanno Tuor han envidau la FMR da visitar ina sera d’exercezi per seperschuader co ei tuna. «Avon biebein in onn e miez essan nus sedecidi da cumprar instruments novs», ha il dirigent getg vendergis, a caschun dalla viseta. Ina cumissiun ord las atgnas retschas ha surpriu il pensum da realisar il project dall’instrumentaziun nova. «Nus sunavan cun material che era en diever dapi varga 50 onns», ha Toni Schuoler raquintau.

Ina da treis musicas en vischnaunca

Suenter ina analisa dalla situaziun era ei semussau che la musica drovi 18 instruments novs. Ils instruments dalla battaria e percussiun han ins buca remplazzau, quels ein semussai sco adattai al temps ed als basegns. Per ina uniun dil vitg ei la cumpra da cornets, trumbettas, corns en es, trumbas, eufonis, bass e posaunas in project ambizius. Il preventiv ha quintau cun ina investiziun da biebein 100 000 francs. «Quels daners havein nus rabitschau ensemen cun agid da donaziuns da fatschentas, fundaziuns e persunas privatas», aschia Ermanno Tuor. Acziuns da rimnar specialas, sco «Lokalhelden» dalla Banca Raiffeisen han gidau fetg ed era la vischnaunca da Breil ha contribuiu ina tiarza dalla summa totala. La musica da Danis-Tavanasa ei dil reminent ina da treis ch’ei dat sin territori communal da Breil. Era La promoziun da cultura dil cantun Grischun e l’interpresa Caduff da Tavanasa han viu la necessitad, medemamein la pleiv da Breil ed ina retscha d’ulteriurs sponsurs e fauturs.

«Enorma legria havein nus giu cu nus havein viu con generusas e beinvulentas las fatschentas e las interpresas e la populaziun dalla vischnaunca e dalla regiun ein stadas cun porscher maun e daners per finanziar nossa instrumentaziun», san ins leger el program dil concert. Quel ch’ei proximamein, numnadamein la dumengia da Tschuncheismas, ils 24 da matg 2026. Ei savess esser circa il 105avel concert dapi la fundaziun dall’uniun gl’onn 1920. Sco en auters vitgs che han ina musica, embellescha quella da Danis-Tavanasa era fiastas ecclesiasticas e profanas. Ina musica dat colur e vigur alla veta dil vitg, seigi da perdanonza, da Sontgilcrest, pil di dalla mumma ni d’autras caschuns.

Ils «BrassKids» da Danis-Tavanasa

Il concert annual ei mintgamai il punct culminont digl onn da musica. Toni Schuoler exercitescha cun ina squadra motivada. «Nus havein in fetg bien tegn denter nus e la cumpignia vala bia», constatescha il dirigent. Dapi tschun onns meina el quella formaziun ed ei satisfatgs digl effect che la midada d’instruments ha fatg. Il fevrer ha la musica che suna ella formaziun da brass priu enta maun l’emprema gada ils instruments novs e da Tschuncheismas vul ella presentar il tun niev.

Ils davos onns ei il diember da musicantas e musicants dil reminent carschius levamein. «In fatg che fa grond plascher a nus ei era che nus astgein integrar en nies concert d’instrumentaziun nova era ina formaziun giuvna da novizs, ils BrassKids. Emma, Lea, Dorothea, Mailin, Norina, Larina, Yara-Lynn ed Elia sunan gl’emprem onn. La societad da musica ha scolau sezza ils otg affons, quels seigien fetg motivai e selegrien d’astgar dar l’emprema gada in pign concert, ha Toni Schuoler sincerau. Tgei tradescha il dirigent dil program «grond», vul dir da lur producziuns? «Igl ei in concert da divertiment, cun rock e pop che vegn a plascher», gi il menader dalla formaziun da 28 musicantas e musicants.

Vendergis vargau han ils da Danis-Tavanasa dau las davosas glimadas vid tocs sco «A Whiter Shade of Pale», ina ballada da Keith Reid e Garry Brooker. Il toc «This is Brass!» da Frank Bernaerts cun bia tempo ei il cuntrast leutier, medemamein il marsch «Band Contest» da Jean-Pierre Fleury. Cun «The Floral Dance», ina renomada canzun ord il Cornwall, ina regiun ell’Engheltiara, vegn la brassband a divertir specialmein – culs instruments novs.