80 commembers novs

En tut ha l’organisaziun prestau gl’onn 2025 27’314 uras tier la clientella. Gl’onn precedent eri stau 26’399. Quei scriva l’organisaziun Spitex Selva en siu rapport annual. Gl’onn vargau ha ella buca mo visitau gi per gi casas e habitaziuns privatas, per tgirar ed assister alla clientella. Igl onn 2025 ei stau in onn giubilar e Spitex Selva ha organisau 13 occurrenzas per e culla populaziun. En tuttas sis vischnauncas affiliadas, a Trin, Flem, Falera, Laax, Sagogn e Schluein eis ella stada presenta il matg e zercladur en loghens frequentai. «Nus havein vuliu festivar gl’anniversari ensemen culla populaziun. Igl ei lu era stau in grond plascher co la glieud ei separticipada», scriva Andrea Montalta el rapport annual che la Spitex Selva ha gest tarmess a commembras e commembras. A caschun dallas sentupadas ei la suprastonza stada en acziun, ella ha purschiu spisa e bubronda ed ha discurriu cun passantas e passants..

36’670 visetas

La maioritad da tala glieud sto buca saver grau d‘agid ed assistenza a casa. Aunc buca. Aschia han biaras e biars capiu la necessitad ed il senn dalla spitex. Sco quei ch’ins sa leger el rapport annual, ein 80 persunas lu era s’annunziadas sco commembras novas dalla Spitex Selva. Actualmein dumbra la Spitex Selva 350 commembras e commembers. La contribuziun annuala da 20 francs ei plitost simbolica. Igl ei ina manisfestaziun da solidaritad per in’instituziun ch’ei datier alla populaziun. Las sfidas che quella sto dumignar ein tuttavia buca pintgas, gliez fatg ha la presidenta buca zuppau. La situaziun da persunal seigi stabila, denton sche mo duas persunas maunchien, vegn ei stretg culla planisaziun. Pervia da malsognas ed accidents hagien diversas buca saviu luvrar, quei che hagi pretendiu dalla squadra en acziun bia flexibladad ed promtadad da luvrar dapli. Gl’onn 2025 ha la Spitex Spitex recepiu 127 clients novs e gl’engaschi per 132 ha ella saviu terminar. Pli che 50 % da quels cass seigien seremess e vegni independents d’agid. Duront gl’entir onn 2025 ha l’organisaziun fatg 36’670 visetas cun tgira ed assistenza a casa, ella media ein quei pli che 100.