Lectura Rumantscha

Be 150 onns?

Atgnamain ha Tieni Monsch fundà il Chor maschadà da Flond enturn l’onn 1852. Cunquai che la data exacta n’è betg documentada, po quest chor dentant schonglar in pau cun ils giubileums. E quai fa el apunta quest onn cun festivar ses 150avel anniversari. Dal tuttafatg arbitrara n’è questa festa tuttina betg. Ella sa referescha a la quarta festa da chant districtuala a Glion da l’onn 1876. A quella era il Chor maschadà da Flond numnadamain sa preschentà. Tant è segir.

Be ina buatscha?

El è in artist da num e pum. Sco ch’in sguard davos las culissas – ubain sut la buatscha – da Not Vital mussa però, correspundan intginas istorgias da l’artist engiadinais dentant «be circa» a la realitad. Tranter auter savura apunta l’istorgia da la famusa buatscha da bronz in pau marscha. Not Vital di ch’el haja gidà da construir in ospital a Kathmandu grazia al retgav da la vendita da sias buatschas. Sco che la retschertga da RTR mussa, haja el però «be» contribuì plirs milli francs a l’associaziun Nepal Burn Society.

Be «boomers»?

Ella stat per natira e vita purila svizra – la tiba. E forsa n’è ella gist pervia da quai betg uschè populara tar giuvnas e giuvens e plitost in instrument dals uschenumnads «boomers». Tar il tschintgavel concert da tibas sut tschiel avert a Lai ha la maioritad dals sunatibas numnadamain gì dapli che 60 onns. Malgrà la mancanza da giuvnas e giuvens saja però plaschaivel che bun 50 musicists – ed er adina dapli musicistas – han chattà la via a Lai, uschia l’organisatur dal concert Reto Guidon.

A revair e bun divertiment cun la Lectura Rumantscha!