Onn legraivel
La Chasa Editura Rumantscha ha vendì prest 3000 cudeschs l’onn passà – e malgrà in lev deficit fa la manadra Nadina Derungs ina bilantscha positiva.
La Chasa Editura Rumantscha (CER) ha ier mardi tramess ses rapport annual a las medias. Per la CER saja il 2025 stà in «onn da gestiun legraivel cun in program editorial varià e litterarmain ferm», stat scrit en quest rapport. Cun quatter novs titels e duas restampas ha la CER publitgà ina paletta variada l’onn da gestiun 2025. Las cifras da vendita muntan a 2984 titels – quasi sco l’onn avant. L’unica sumbriva è in lev deficit en il quint annual che mussa las cundiziuns pretensiusas per ina pitschna chasa editura. Tut en tut fa la chasa editura dentant ina bilantscha positiva. La FMR ha tschentà trais dumondas a la manadra da la CER Nadina Derungs.
FMR: L’onn passà ha la CER fatg in lev deficit. Tge giavischais Vus per ils proxims onns – e duvrassi in «bestseller» rumantsch?
Nadina Derungs: Jau giavischass per la CER ina basa finanziala pli stabila che enfin uss. Cler, igl è gia adina stà uschia che la CER n’ha betg gì grondas reservas, ma nus avain propi in deficit structural. Cun tut quai che nus faschain na tanschi simplamain betg. Era sche nus avain atgnamain gì in super onn, cun buna litteratura, ina gronda preschientscha a bleras occurrenzas e perfin cun premis.
E per vegnir a la dumonda dal bestseller: sa chapescha che nus avain bestsellers rumantschs che sa vendan bain! Il pli impurtant è dentant che nus avain blers differents cudeschs per tut las gruppas en mira. Pli gugent blers buns cudeschs che in «grond».
Intelligenza artifiziala è actualmain il supertrend global. È leger «cudeschs» insumma anc popular e faschais Vus stim dad ina midada?
Las cifras da vendita èn vinavant fitg legraivlas cun circa 3000 cudeschs. Quai è circa er en il rom dals ultims onns. Tge che sa mida segir è la muntada dal leger. Tenor in’opiniun pessimistica dad in scienzià essan nus sin buna via en ina societad pli orala ed audiovisuala. Mia speranza fiss che leger survegn ina nova valur en in temp che para adina da vegnir pli svelt. Leger porscha era ruaus ed igl è bain bel da s’approfundar en istorgias ed auters munds e da scuvrir uschia autras perspectivas.
Avais Vus anc in tip da lectura rumantscha per las vacanzas da stad?
Il roman «Tschiera» da Flurina Badel datti da nov era sco cudesch auditiv. Lura pudessan ins guardar ora sin la muntogna u sin la mar e mangiar in glatsch sper tadlar. Per uffants e famiglias savess jau recumandar il crimi «Affers da famiglia» da Gianna Duschletta.
Gust da leger dapli?