Per la quarta ga el vitg claustral

1983 ha la Secziun da catschadurs Péz Alpetta organisau l’emprema ga la radunonza da delegadas e delegai dall’Uniun cantunala dils catschadurs da patenta dil Grischun. 2001 ei quei stau il cass la secunda ga e 2009 han ils catschadurs da Mustér arranschau la radunonza communablamein cullas secziuns Vallatscha/Medel e Badus/Tujetsch. Uonn segna la Secziun Péz Alpetta puspei persula per l’organisaziun dalla radunonza cantunala – la 111avla. «En ina radunonza generala extraordinaria han las commembras ed ils commembers dalla secziun decidiu d’organisar quella ga persuls quella radunonza», di il president dil comité d’organisaziun Tomas Schmed. Sco president dil District da catscha dalla Cadi eis el era commember dalla suprastonza cantunala gronda dils catschadurs grischuns. La radunonza dallas catschaduras e dils catschadurs grischuns ha liug sonda, ils 23 da matg 2026 el Center Fontauna.

Per part public

La radunonza dall’Uniun cantunala dils catschadurs da patenta dil Grischun ei buca mo in’occasiun formala cun decider davart in tschuppel fatschentas, mobein era la caschun da s’entupar dils adherents dalla catscha. La Secziun Péz Alpetta arva denton era las portas alla publicitad. Dallas 10.30 entochen las 13.30 ha ina e scadin la pusseivladad da prender investa dalla localitad dalla radunonza cun ina gronda preit da trofeas dalla catscha indigena. «Las commembras ed ils commembers mettan a disposiziun lur pli bialas trofeas e preparats. La preit cun quellas ei segiramein ina dallas grondas attracziuns dalla radunonza», di Tomas Schmed. Las 13.30 entscheiva la radunonza e la sera ei la tscheina cul program da rama. Sper ils stans cun rauba ed uaffens da catscha organisescha la secziun era ina «Tauna dil luf». Quella bar ei medemamein aviarta per la publicitad naven dallas 21.30.

Prest 100 onns veglia

Arranschar la radunonza cantunala ei buca mo cumbinau cun bia lavur organisatoria, mobein era cun in grond engaschament ils dis avon, duront e suenter la radunonza. «Tut en tut lavuran rodund 100 persunas vid quella radunonza. Sper las commembras ed ils commembers cun partenarias e partenaris havein nus era il cletg ch’autras ed auters segidan cun nus. Mo aschia ei quei pensum da dumignar», di Tomas Schmed. Gia la tscherca dil termin per la radunonza seigi stada ina sfida: «Il matg cun biars firaus ei quei buc aschi sempel.»

Per la radunonza cantunala ha la secziun era formau in cudischet cun in tschuppel informaziuns davart la radunonza, la catscha e la fauna en general. En biebein treis onns sa la Secziun da catschadurs Péz Alpetta festivar il giubileum da 100 onns. Il december 1929 eis ella numnadamein vegnida fundada sco Secziun da catschadurs Muraun Mustér. Entochen 1943 han era ils catschadurs da Tujetsch apparteniu ad ella ed entochen 1945 era quels da Medel. Dapi 1977 senumna la secziun Péz Alpetta. La secziun organisescha regularmein siu di da tgira, la catscha communabla, exercezis da tir ed il tir intern.

Elecziun d’in niev president

El center dallas tractandas dalla 111avla radunonza dall’Uniun cantunala dils catschadurs da patenta dil Grischun da sonda proxima a Mustér ein las elecziuns. Tarzisius Caviezel seretila sco president, sco niev president ei Benjamin Hefti proponius. La gronda part dalla suprastonza centrala stat a disposiziun per ina reelecziun. Plinavon ei vegniu inoltrau ina suletta proposta d’ina secziun pertuccont il menaschi da catscha. La Secziun da chatscheders Albris Puntraschigna propona d’obligar tuttas catschadurs e tuts catschadurs da mussar lur preda sittada duront la catscha alla survigilonza da catscha. 84,6 % dallas catschaduras e dils catschadurs fetschien gia quei.