Club da golf da Breil va el tierz decenni

Avon paucs dis ha il Club da golf da Breil presentau sia nova identificaziun visuala. Cun in niev logo, ina pagina d’internet surluvrada ed ina nova cumparsa visuala entscheiva il club da golf siu tierz decenni dapi la fundaziun. La nova cumparsa visuala colligia la tradiziun e las valetas dil club cun ina orientaziun viers il futur. Cul motto «familiar e pacific» vul la gestiun dil club plidentar novs hosps e commembers silla plazza da golf che schai silla collina da Tschuppina agl ur dil vitg da Breil.

Muments impurtonts

Il president actual dil club da golf da Breil, Alfons Livers ed il president d’honur, Marcel Friberg seregordan da muments decisivs dils onns entuorn la fundaziun dil club. Ina gruppa d’iniziativa seigi igl emprem ida alla tscherca d’in sulom necessari per ina plazza da nov ruosnas. Cattau quei sulom hagi ins a Tschuppina ella vischinonza dils stabiliments militars. Spluntau hagi ins da lezzas uras  tier la vischnaunca burgheisa da Breil ch’era da quei temps possessura dil sulom. Quella hagi decidiu ils 11 da mars 2000 da metter a disposiziun il terren als iniziants dil club da golf. La gronda discussiun enteifer la radunonza e la decisiun positiva alla fin seigi stau igl emprem punct culminont. Sco secund punct culminont numnan ils suprastonts l’avertura dil plaz da golf il zercladur digl onn 2006.

Tut che vuleva

Sper Sagogn e Sursaissa hagi era Breil deponiu el rom dalla planisaziun regiunala siu interess per ina plazza da golf en Surselva, dian il president actual ed il president d’honur dil club da golf giubilar. Alla fin finala hagi Breil saviu presentar spert in concept che hagi perschuadiu ils responsabels dalla planisaziun regiunala.

Suenter l’avertura dil 2006 ha il Club da golf da Breil organisau duas gadas il Campiunadi grischun da golf. Tenor Alfons Livers e Marcel Friberg ei quei in dils pli impurtonts turniers per far enconuschent ina nova plazza da golf el Grischun. Oz vegn la plazza da golf da Breil duvrada da circa 10’000 persunas ad onn, quei pia da golfistas e golfists indigens e da hosps da vacanzas. Tenor la gestiun dalla plazza da golf a Tschuppina ein quei dunnas ed umens giuvens e pli vegls entochen 85 onns. La sviulta annuala dil Club da golf da Breil munta a bunamein in milliun francs.

Pil turissem da stad

Per Breil sco vitg turistic seigi il plaz da golf d’impurtonza essenziala, dian ils responsabels dil Club da golf. Il plaz ch’attili era hosps digl exteriur hagi  effectuau che gastronoms da Breil seigien stai promts d’investir en lur restaurants e hotels. Mo era pils possessurs da secundas habitaziuns a Breil seigi il sport da golf essenzials. Ed alla fin finala seigi la plazza da golf da Breil era stada in argument pils investurs dil ressort da vacanzas Pradas sper il lag da Breil.

Nov plus treis ruosnas

Dallas plazzas da golf en Surselva ei quella da Breil che fa printgas per dus decennis uonn la suletta en Surselva che porscha era in plaz da trenament per entschevidras ed entscheviders. La plazza da trenament cun treis ruosnas secatta directamein sper il restaurant da golf Tschuppina. Igl avantatg tenor la gestiun dalla plazza ei che mintgina e mintgin ch’entscheiva a dar golf sa ir spert silla plazza da golf per entscheviders senza absolver igl emprem in examen.

Program da giubileum

Plans pil futur detti ei adina, dian Alfons Livers, il president actual e Marcel Friberg ch’ei president d’honur dil Club da golf da Breil. In siemi pil futur fussi ei segir da saver engrondir il plaz da golf da nov sin 18 ruosnas. Mo quei plan seigi aunc silla gliesta da giavischs dil club.