«Nus stuein buca – nus astgein calar»

«En nossa fatschenta stat la famiglia el center. Roland Albin ei il meinafatschenta ed era il frar Mario lavura tier Albin SA ed ei il grond specialist da vin. Tier occurrenzas, sco per exempel la gronda degustaziun annuala, lavuran tut ils frars e lur affons maun en maun.» Quei text ei d’anflar silla homepage dalla Albin SA, aunc pli enconuschenta cul num Albin Vin e Bubrondas da Trun. La cussegliaziun ed il commerci cun vin e bubrondas ei stau siu survetsch professiunal ils davos decennis. Che quei ei succediu ils davos 40 onns en in grond baghetg gest sper la plazza da ballapei a Trun ei buca casual, mobein significativ. Ils quater frars Werner, Mario, Roland ed Armin ein stai pissiunai giugadurs da ballapei ed ein s’engaschai onns alla liunga en ina fuorma ni l’autra el CB Trun, respectivamein CB Trun/Rabius. La fin da zercladur 2026 va l’era dall’interpresa da famiglia Albin a Trun a fin. «Lu serrein nus nossa fatschenta. Nus stuein buca – nus astgein calar», puntuescha Roland Albin.

Transports, vin e bubrondas

All’entschatta dall’interpresa Albin SA a Trun avon rodund 75 onns ein buca vin e bubrondas stadas. «Entschiet ha tut cul tat Benedetg. El fageva la camionage a Trun; menava rauba cun carr e cavegl dalla staziun dalla viafier tiels vischins. Sco buobs astgavan nus segidar ina ga ni l’autra. Il bab Lorenz ei ius en quels fastitgs. El ha cumprau in auto da vitgira e pli tard ulteriurs vehichels», seregorda Roland Albin. Cun ses vehichels menava el material sin plazzals, per exempel cement per la construcziun dils mirs da fermada ni il necessari per construir las lavineras sur Trun. «Il bab fageva denton aunc auters survetschs: Carrar el spital a Glion cun dunnas che havevan da parturir, transportar fein e purschals pils purs ed ina ga ni l’autra era serender ordeifer per ina bara. Tier si’incarica s’udeva pli baul era il transport da rumien», di Roland Albin. 1986 ei la famiglia Albin lu sedecidida pil commerci da vin e bubrondas. Dus onns pli tard ei la halla sper la plazza da ballapei a Pustget vegnida construida per quei intent.

Il temps semida

Che l’interpresa Albin SA siara sias portas la fin da zercladur 2026 ha plirs motivs. «Il temps ei semidaus. Miu frar Mario ed jeu essan ella vegliadetgna d’entuorn 70 onns ed aschia el temps da calar da far fatschenta. Ina successiun en famiglia havein nus buca vuliu ed era buca tschercau», di Roland Albin ch’ei meinafatschenta dall’interpresa dapi 2005. Ins seigi bein staus en discussiun cun autras interpresas dalla medema branscha, mo era leu seigi sedau negina soluziun. «Igl ei denton era aschia che biaras ustrias han serrau ni siaran ed ellas camonas alpinas vegn la rauba sgulada cun helicopter. Leutier vegn la mobilitad d’in e scadin ozildi, la dependenza che zatgei vegni furniu a casa ei buca pli. Facit: Nus vendin dameins che pli baul», declara Roland Albin e puntuescha: «Igl ei stau fetg emoziunal da declarar alla clientella che nus serreien la fatschenta.» 15 onns ha l’Albin SA saviu furniu bubrondas alla Neat a Sedrun. Ella ei stada engaschada per part ell’entira Surselva entochen Flem. La halla ei ton sco vendida ed ils 13 da zercladur 2026 fa la Albin SA per ina davosa ga viva cun sia clientella ella fatschenta el contuorn da Pustget. Lu mira l’interpresa anavos sin in temps da fatschenta da rodund 75 onns. Il zercladur fa ella era acziuns specialas. «Quei che vonza consumein nus sezs», di Roland Albin cun bucca rienta.

In survetsch da tut temps

Sper privats e la gastronomia, mo era autras instituziuns e fatschentas, ha la Albin Vin e Bubrondas SA tgirau bunas relaziuns cullas uniuns. A numerus arranschaments ha ella furniu vin, bubrondas e spirituosas, mo era l’infrastructura leutier. «Nus havein giu buns collaboraturs e bia buna e fideivla clientella. Quella havein nus denton era puppergnau e furniu rauba per part era duront la notg ni las dumengias», di Roland Albin. Sper in bien survetsch seigien las relaziuns persunalas stadas fetg decisivas en tut quels onns. Cun plascher mira el denton era anavos sillas sentupadas ella stiva da vin el baghetg dalla fatschenta ni era sillas degustaziuns annualas ella sala da cultura a Trun cun per part 300 participontas e participonts.