Il spital sto schar plemas
El niev maletg empalont da sanadad dils proxims diesch onns recamonda il Cantun da serrar denter auter era la partiziun da parturir el Spital regiunal Surselva a Glion. Pils responsabels dalla corporaziun da vischnauncas SanaSurselva ei quella novitad negina surpresa. «Nus astgein buca far illusiuns», di René Epp, il president dalla SanaSurselva, ell'intervesta culla FMR. Decidiu vegn pér egl uost 2026.
Tenor il cusseglier guvernativ Peter Peyer, menader dil Departament cantunal da giustia, segirtad e sanadad duein tut ils 11 spitals dil Grischun vegnir manteni. Sco Peter Peyer ha detg mesjamna alla informaziun da medias davart il maletg empalont, daventass ei fetg nunattractiv da viver ellas regiuns grischunas senza in bien provediment da basa cun ils spitals regiunals. Ei seigi denton d’adattar la purschida. Il cusseglier guvernativ cusseglia als spitals da Tavau e da Glion da serrar lur partiziun da naschientschas.
Pils responsabels dalla corporaziun da vischnauncas SanaSurselva ei quella communicaziun da Peter Peyer negina surpresa. René Epp, il president dalla SanaSurselva ha detg enviers RTR ch’il diember da naschientschas en Surselva seigi memia bass per menar vinavon ina partiziun da naschientschas senza daners supplementars.
FMR: Tgei munta quei per la Surselva, sch’il Spital regiunal a Glion siara sia partiziun da naschientschas?
René Epp: Igl ei de facto aschia ch’il cantun recamonda da serrar la partiziun da naschientschas. Nus mein da quei anora che quella prestaziun sesanfla el futur buca pli silla gliesta da prestaziuns dil Spital da Glion. Consequentamein vegn quella prestaziun era buca pli sustenida finanzialmein. La suprastonza dalla SanaSurselva ha gia menau ils davos meins dabia discussiuns cun las persunas responsablas dil Spital e dalla Reit da sanadad ed ha aschia fatg ses pensums da casa. Sin basa dalla digren marcanta dallas naschientschas e dil niev maletg empalont dil cantun vegn la suprastonza dalla SanaSurselva a tractar quella situaziun ed preparar in messadi corrispundent per mauns dalla radunonza da delegai dils 25 d’uost 2026. La radunonza vegn a decider igl uost davart quella prestaziun el rom dalla nova cunvegna da prestaziuns denter la SanaSurselva e la Reit da Sanadad Surselva che va en vigur cun igl 1-1-2027.
Il niev maletg empalont recamonda era al spital da Glion da limitar ils temps da menaschi dil spital.
Quei vuless dir ch’il spital ei buca
pli aviarts da tuttas uras e siat dis
ad jamna?
Davart la prestaziun chirurgia ed il menaschi leutier (neginas operaziuns pli duront la notg) ei gia vegniu decidiu alla radunonza da delegai dils 11 da november 2025. Ils responsabels dil spital vegnan ad informar igl uost 2026 davart quella reorganisaziun.
Co vuleis vus perschuader las vischnauncas dallas mesiras che vegnan proponidas el maletg empalont?
Nus havein gia informau las vischnauncas davart quellas tematicas e vegnin vinavon a nezegiar il proxim temps per far la discussiun necessaria. Las decisiuns vegnan dadas la fin uost sin basa dil messadi numnau sura che vegn tarmess el decuors dall’entschatta uost 2026.
Al maletg empalont suonda sin palancau cantunal la planisaziun dils spitals. Co vegn quei a veser ora pil spital da Glion?
Tenor mia opiniun vegnan las recumandaziuns fixadas ils proxims 1-2 onns definitivamein sin la gliesta da prestaziuns dils spitals. Cheu astgein nus buca far illusiuns. Nus vegnin a veser.
Gust da leger dapli?