Gudiu las vacanzas da primavera sil bike

Duront quater dis han 20 affons e giuvenils astgau seprofundar el mund dil bike a Glion. Il program quotidian purschius da MS Sports dils 14 entochen ils 17 da matg 2026 ha cuzzau mintgamai naven dallas 09.30 entochen allas 16.00.

Migliurau las habilitads

Sco MS Sports scriva en ina communicaziun als mieds da massa, ha el cunteniu dus trenaments. Leutier han ils participonts saviu migliurar lur habilitads, emprender bia niev e surtut haver bia plascher. Il vast areal dil stabiliment da scola da Glion ha purschiu premissas idealas persuenter. La menadra dil camp Sabine Speidel ei stada fascinada: «Nus havein saviu procurar per in bellezia parcours, nezegiar scalas ed eran spert sin trails egl uaul vischinont spel Rein. Era igl indrez da pumptrack a Glion ei staus in highlight.»

Recreaziun activa

Denter ils trenaments ein ils participonts vegni puppergnai cun in gustus gentar ed il program da miezdi ha procurau per recreaziun activa. In mument special ei il di final staus: Avon geniturs, tats, tattas e fargliuns han ils affons e giuvenils presentau en in parcours d’inschign cun luschezia quei ch’els han empriu duront l’jamna da camp.