Pimp my raviolis

Raviolis or da la conserva perfecziunesch’ins uschia: bittar la trucla anc serrada immediat en il rument. Quai ha jau legì sin x-in forum en la rait. Ed jau conced, raviolis or da la conserva n’èn propi betg ina delicatessa da gourmet. Dentant è questa tratga precuschinada in vair classicher, sch’i sto ir ina giada in zic pli spert en cuschina.

E sche quai fiss ina giada il cas, vali la paina dad investir duas minutas en pli per transmidar raviolis ordinaris or da la conserva en raviolis «pimpads». Uschia èsi capità tar mai l’emna passada. Jau era l’entira emna numnadamain in vaiv temporar. Betg che jau na savess betg cuschinar. Schizunt il cuntrari – almain tenor testimoni da mia famiglia.

Ma cun ir a far cumissiuns, ha jau tuttenina vesì ina trucla da raviolis che guardava da quai simpatic vers mai, svegliond memorias culinaricas da pli baud. Numnadamain da raviolis or da la conserva gratinads. Ed jau stoss dir, quels raviolis gratinads han gustà precis sco da lezzas uras – betg in highlight da la «haut cuisine», mabain simplamain raviolis or da la buna cuschina da chasa.

Ed il recept è bunamain uschè simpel sco avrir ina conserva da raviolis sezza: metter ils raviolis en ina furma da gratinà, agiuntar tenor giavisch tocs paintg, groma e chaschiel grattà, metter la furma per radund 30 minutas en il furnel prestgaudà (200 grads) e voilà: Or dals raviolis ordinaris datti in tratg che sa lascha gustar, sch’i sto ir ina giada in zic pli spert.