Rapport finel sainza conclusiuns

Trais persunas sun mortas pro quel accidaint als 17 marz 2025, la pilota e duos passagers. Duos minuts zieva la partenza da la plazza aviatica a Samedan d’eira l’aviun crudo sün territori abito i’l cumün La Punt Chamues-ch. Intaunt cha l’aviun es gnieu desdrüt cumplettamaing, nun ho sül terrain üngün pati dan.

Eir il rapport finel publicho bundant ün an zieva la disgrazcha nu nomna üngüna radschun definitiva per la disgrazcha. Il SUST titulescha il documaint scu «rapport da fats» e desista – oter scu in oters rapports – da trer a la fin da quel conclusiuns a reguard l’accidaint. Invezza scriva il SUST cha «i’l decuors da la perscrutaziun s’ho musso cha pervi d’üna manchaunza da datas dal svoul e pervi da la ferma destrucziun da l’aviun sun pussiblas declaraziuns preventivas be in möd limito.»

Massa da l’aviun sur il limit

Tenor il SUST vaiva l’aviun pervi dal pais dal bagagl, dals passagers e dal carburant il tanc üna massa da 5 % pü ota scu la massa maximela i’l mumaint da partenza. Inavaunt scriva il SUST traunter oter eir cha cun granda prubabilited as stordschaiva il propeller da l’aviun i’l mumaint da la collisiun auncha. L’autopsia da la pilota ho musso üna concentraziun da 0,53 promils alcohol i’l saung. Cha quella concentraziun d’alcohol pudess però eir esser la consequenza d’üna fermentaziun zieva la mort, agiundscha il SUST.