Dapli peisa per l’historia dil medieval

Roman Flepp, il president communal da Breil, ha detg igl avrel vargau sin damonda dalla FMR che la purschida culturala dil vischinadi da Vuorz seigi da gronda valeta per l’entira vischnaunca. Ed el ha era fatg allusiun a siu interess era sco commember dalla cumissiun dil Museum Meister da Vuorz da dar dapli peisa alla historia dil medieval da Vuorz. Forsa ch’ei dessi schizun pusseivladads d’augmentar la purschida el baghetg dil museum.

Duas purschidas sut in tetg

Avon varga diesch onns ha l’anteriura cumissiun dil museum decidiu da slargar la purschida digl Arcun da tradiziun ch’era gia da quei temps domiciliaus ella Casa Cadruvi. Guido Dietrich fa era part dalla cumissiun dil museum ed ei da medem mument president dall’uniun privata che senumna Uniun Meister da Vuorz. El di ch’ins hagi gia igl onn 2013 decidiu da cumpletar la purschida digl Arcun da tradiziun cun documents ed informaziuns dil Meister da Vuorz. Quei era pil motiv ch’igl Arcun da tradiziun, il museum local cun exponats vegls dalla vischnaunca, svegliavi memia pauc igl interess tier il publicum. «Nus havein ditg ponderau co far ed essan vegni alla conclusiun che Vuorz savess porscher bia dapli cun exponer l’historia dil temps medieval, denter auter era documents dil Meister da Vuorz.»

L’historia dil medieval

«Nus a Vuorz havein la baselgia, nus havein ils castials e nus havein il Meister da Vuorz», di Guido Dietrich. Il meister dalla pictura medievala stendi sias alas sur Vuorz ora era en auters loghens dil Grischun. Quei detti sinergias era pil museum. «En scadin cass havein nus ussa dapi 13 onns ina partiziun cun ina entira documentaziun davart il Meister da Vuorz e sia lavur a Vuorz ed en plirs loghens ch’el ha luvrau duront sia veta.» Ella tiarz’alzada dalla Casa Cadruvi ei endrizzau ina stanza da lavur per studentas e students ni era persunas che vulan sedocumentar cun l’ovra dil pictur artist.

Originals dat ei mo en baselgia

Sper il museum cun la cumissiun dil museum exista l’Uniun Meister da Vuorz che sustegn ils fatgs dil museum en moda ideala. L’uniun ha era gia organisau ils dis dil Meister da Vuorz ed ha fatg lavur cumina el museum. Guido Dietrich di ch’il museum hagi oz dapli frequenzas che antruras: «Quei schegie ch’ils hosps van en emprema lingia ellas baselgias per mirar las picturas originalas. Alla fin finala ein ils originals gie adina ellas baselgias e la purschida dil museum ei cumplementara.»

Differentas pusseivladads

Ils responsabels operativs dil Museum Meister da Vuorz beneventan l’idea dil president communal Roman Flepp da slargar la purschida dil temps medieval. «Tier las perdetgas dil medieval s’audan quater castials ni restonzas da castials», declara Guido Dietrich. Il vitg Vuorz hagi ina reha purschida historica e quella savessi ins optimar il temps da stad. «En nossa Casa Cadruvi dat ei differentas pusseivladads da sanar ed endrizzar las stanzas da niev. Mo ei dat era sper la Casa Cadruvi ina casa da scola ed ina canzlia ch’ins savess duvrar per la cultura dil vitg.»

La cultura
sper autras purschidas

El center dallas ponderaziuns da migliurar igl access alla purschida dil Meister da Vuorz stat era ina pusseivladad per in kiosc ni in caffé. «Forsa ch’ei dess aunc autras pusseivladads da cumbinar meglier la veta culturala cun ils basegns dil mintga di el vitg», di il representant dalla cumissiun dil museum. «Quei che nus stuein era ponderar ei co nus vulein reglar igl access al museum egl avegnir. Ina pusseivladad fuss in access automatic che arva la damaun e siara la sera.» Guido Dietrich accentuescha denton ch’ins hagi entochen ussa mo ideas. Quellas stuessien vegnir concretisadas il proxim temps.