Grond interess giuvenil pel sport da tir

Silvio Burkhard e Severin Laurent da Sent, Fabio Griep da Tarasp ed Alessio ed Enrico Lehner da Zernez: Els sun tschinch dad in tuot nouv giuvenilas e giuvenils chi han cumanzà da nouv il cuors da tregants giuvens quist on i’l district Engiadina Bassa. Uschè blers tregants giuvens nun ha la Società da tregants Sent dürant ils ultims ons mai plü gnü. In tuot fan nempe quista stagiun part 31 giuvnas e giuvens, da quels treneschan e tiran set a Samignun ed il rest pro’l stand da tir Urezzas tanter Scuol ed Ardez.

Grond plaschair – eir pro’l manader

Quai fetscha fich grond plaschair, manaja il manader dal cuors da tregants giuvens Simon Raisun dad Ardez a chaschun dal trenamaint in sonda passada. «Quai es fich bel. Ils giuvnots vegnan adüna cun buna glüna al cuors ed eir dürant la sonda e lur temp liber. Quai demuossa dal sgüra eir cha nus fain nossa lavur inandret. E sch’els han plaschair, schi n’haja eir eu plaschair.»

Pellas giuvenilas e’ls giuvenils haja gnü nom dürant quist trenamaint da sonda passada da trar ouravant il tir champester chi ha lö quista fin d’eivna in tuot la Svizra (guarda boxa). E culs resultats da seis tregants giuvens es Simon Raisun fich cuntaint. «Nus vain üna tabella illa quala nus notain tuot ils resultats da la stagiun. E schi’s guarda co chi’d es gnü trat al cumanzamaint ed uossa, as vezza fich bain il svilup. Fin uossa guarda quella tabella propa oura allegraivla cun üna fich buna media.»

Svilup allegraivel, ma …

Ed apunta allegraivel es eir il svilup dal nomer da partecipaziun dals tregants giuvens. Id haja dat ons chi gnivan be amo var 15 tregants giuvens a trar, quinta Simon Raisun plünavant. El es daspö il 2010 commember da la società da tregants, daspö raduond nouv ons manader dal cuors da tregants giuvens e s’inclegia ch’eir sia carriera ha cumanzà illa gruppa dals tregants giuvens. «Ils temps sco tregant giuven in buna cumpagnia e viagiond per tuot la Svizra intuorn d’eiran adüna ourdvart bels», s’algorda Simon Raisun. E cha perquai vala eir la paina da pudair spordscher inavant buns trenamaints per pudair pussibiltar talas experienzas eir a las prosmas generaziuns.

E da bellas experienzas cun gronds success ed in buna cumpagnia savess eir el quintar üna pruna, Ueli Krebs da Sent. El es stat sur 37 ons president da la Società da tregants Sent ed es fingià daspö 47 ons commember da la società. El as regorda da temps cur cha bod mincha cumün vaiva amo ün agen stand da tir e cur cha be il district Engiadina Bassa svess vaiva dudesch societats da tregants activas illa regiun. E da quellas dudesch societats manaivan tras in tuot ses societats cuors da tregants giuvens cun «dal sgüra üna sesantina da giuvenilas e giuvenils, forsa dafatta amo daplü».

Uossa sun activas amo in tuot ses societats i’l district Engiadina Bassa e l’unica società chi spordscha amo cuors da tregants giuvens es la Società da tregants Sent. Plü pacas societats, plü pacs cuors da tregants giuvens e consequentamaing eir plü pacs tregants giuvens in somma. Quai saja oramai il simpel quint ed il gir dal temp, manaja Ueli Krebs da maniera pragmatica.

La promoziun da giuvens chi stà a cour

Ueli Krebs nun ha svess mai manà cuors da tregants giuvens, ma es adüna pront da güdar – sco eir oters commembers – ingio chi douvra agüd. E da quel agüd es impustüt Simon Raisun fich cuntaint. Daplü tregants giuvens nu fetschan in fuond daplü lavur, però illa situaziun actuala cun tants giuvenils chi sun da la partida pella prüma jada, listess ün zich. O sco cha Ueli Krebs declera ed agiundscha: «Ils prüms ons stoust esser daspera cur chi tiran, in prüma lingia pervi da la sgürezza e per imprender ad ir intuorn in möd sgür cull’arma e lura in seguonda lingia per tils sustegner dürant il mirar ed il trar.» Quai natüralmaing eir culla spranza ch’uschè bleras giuvnas e giuvens dvaintan bunas tregantas e tregants e restan – scha pussibel – fidels eir inavant a lur società. Üna società chi dombra üna tschientina da commembras e commembers e chi’d es renomnada per bleras medaglias e titels bainquant sur ils cunfins grischuns oura i’l passà.

Nomer inconstant pervi da la chatscha

La gronda concurrenza saja però la chatscha, accentuescha Ueli Krebs. Blers giuvenils hajan fingià i’l cheu da vulair far ün bel di la patenta da chatscha e’l cuors da tregants giuvens saja üna bun’occasiun per pudair trar fingià in giuvens ons cun ün’arma. E cunquai cha’l cuors da chüra haja lö precis dürant las sondas chi’d es eir trenamaint da trar «nu vegnan blers lura cul temp simplamaing plü».

E quai ha eir Simon Raisun constatà adüna darcheu dürant ils ultims ons, resguardond il nomer da partecipaziun magara inconstant. Però cha suot il strich saja il svilup darcheu positiv e cuntantaivel. E cha la Società da tregants Sent spordscha insomma amo adüna ün cuors da tregants giuvens, saja a la fin eir da valütar sco success pella società.

«Nus provain nos pussibel da svagliar il plaschair pel sport da tir e sperain natüralmaing eir ch’uschè blers sco pussibel restan eir inavant commembers da nossa società e cha nus possan passantar insembel amo bleras e flottas uras in cumpagnia.» E chi sa, forsa eir festagiar insembel darcheu üna prosma medaglia o titel? Perche cha qualità saja avantman, conclüdan Simon Raisun ed Ueli Krebs il discuors. E la prosma schanza per far quai eir bainbod. Nempe dürant la 59avla Festa federala da tir – ün dals plü gronds puncts culminants per mincha treganta e tregant, chi ha lö per regla be mincha tschinch ons e chi cumainza ils 5 gün 2026 illa chapitala grischuna.

Nun invlidar dad ir a trar!

Dals 29 mai fin als 31 mai 2026 ha quist on lö il tir champester. Quai es la plü gronda festa da tir sün tuot il muond. Minch’on e dürant ün’intera fin d’eivna vain celebrada üna da las plü veglias tradiziuns da tir in Svizra. Üna festa da tir na be per tregants, dimpersè per üna e minchün (a partir da 10 ons) chi ha interess da provar oura üna jada. La partecipaziun es gratuita ed ils schluppets e pistolas stan a disposiziun. (fmr/dm)