Finanziaziun dil hotel Acla da Fontauna ei garantida
L’impurtonza dil turissem e digl uaul d’in vart – il stan dils projects en vischnaunca da l’autra vart. Il venderdis sera ein vischinas e vischins da Mustér vegni orientai da quei che cuora e passa en vischnaunca. Novas ha ei dau davart il hotel Acla da Fontauna. La finanziaziun da quel ei garantida. Per discutar il futur dalla parcella Hess amiez il vitg duei vegnir arranschau ina sera d’informaziun igl uost.
L’elecziun dil termin per la sera d’informaziun da venderdis, ils 29 da matg 2026 ella halla da tennis dil Center Fontauna, ei buca stada casuala. En duas jamnas ein numnadamein las elecziuns dil parlament cantunal e dalla regenza. Pils magistrats ch’ein sepresentai alla tribuna ei quei pia stau ina buna caschun da metter sesez ella megliera glisch. Quei han la cussegliera guvernativa Carmelia Maissen ed il cusseglier guvernativ Marcus Caduff lu era fatg, purschend als rodund 130 presents interessantas informaziuns ord lur departaments. Il president communal René Epp ha purtau la buna nova che la finanziaziun dil hotel Acla da Fontauna seigi garantida (mira box) ed il meinafatschenta dalla vischnaunca Roland Cajacob, ha dilucidau il stan dil project dalla sanaziun digl areal da scola a Cons.
Il turissem ei decisivs
Ch’il turissem gioga ina rolla centrala ella vischnaunca da Mustér ei bein clar. Buc adina ein ins denton pertscharts da quei. «Il turissem procura per ina plivalur da 77 milliuns francs ellas vischnauncas da Mustér e Tujetsch. 38 % dils 1485 plazs da lavur ein ligiai direct ni indirect vid il turissem.» Quella ed autras constataziuns davart la rolla dil turissem sisum la Surselva ha il cau dil departament cantunal dall’economia publica e dils fatgs socials, Marcus Caduff, fatg il venderdis sera. Tonaton ha el er alzau il det: «Els dus loghens turistics ei il diember da hotels sereducius ils davos onns da 26 sin 20. Mirau sur tut ora ein ils letgs els hotels occupai per 20 % igl entir onn ora. Cumparegliau culla media grischuna da 40 % han Mustér e Tujetsch pia aunc potenzial en quei connex.»
Dalla muntada digl uaul
Sco tiel turissem ei era l’impurtonza digl uaul buc adina presenta el meini general. La schefa dil departament cantunal per infrastructura, energia e mobilitad, Carmelia Maissen, ha suttastrihau la rolla digl uaul sco mied da protecziun: «Per ch’il manteniment e la tgira da quel funcziuni, ein vias necessarias.» La regenza grischuna ha acceptau il project e credit per l’avertura digl uaul da Val Segnas ed Uaul Run. Vid ils cuosts totals da 28,55 milliuns francs separticipeschan cantun e Confederaziun cun ina summa da 20,64 milliuns francs. Tut en tut vegn baghegiau ni currigiu en quei perimeter ina lunghezia da vias da 9,2 km. «La planisaziun da quei project ha cuzzau rodund 15 onns ed ei stada cumbinada cun bein enqual obstachel. Igl uaul en quei perimeter ei d’impurtonza per la protecziun da habitadis e colligiaziuns», constatescha Carmelia Maissen ch’ei dil reminent burgheisa da Mustér.
Migliurau igl urari
La fin finala ha Carmelia Maissen era fatg allusiun dalla meglieraziun dallas colligiaziuns dil traffic public. «Dapi il december vargau havein nus il tact da mes’ura silla lingia da Cuera entochen Mustér. Quei ei pusseivel era grazia agl auto da posta naven da Glion a Mustér. Persuenter havein nus retschiert biars resuns positivs, era perquei ch’ei ha dau novs loghens da fermada», di la ministra da mobilitad.
Concurrenza pigl areal da scola
Il meinafatschenta dalla vischnaunca, Roland Cajacob, ha rapportau davart il stan dil project per la sanaziun digl areal da scola a Cons. Suenter che la suprastonza communala ha schau far in studi davart la situaziun actuala e las pusseivladads a Cons, scaffeschan las autoritads ussa la basa per la concurrenza da project. En discussiun ei ton ina sanaziun dalla casa da scola baghegiada 1980, sco d’ereger in niev cumplex e spazzar lezza. Examinaus vegn denton igl entir areal inclusiv scoletta e halla Cons. «Silsuenter suonda l’elavuraziun d’in preproject, in project e sche tut va tenor plan la votaziun all’urna davart quei project igl emprem quartal 2028», di Roland Cajacob. El quenta cun cuosts denter 12 e 15 milliuns francs. La finamira ei da realisar il project denter 2029 e 2032. Parallelmein al project ei vegniu sclariu pusseivladads da collaborar cul gimnasi dalla claustra pertuccont il scalem superiur. Igl ei denton semussau che quei ei buca realisabel il mument, seigi per motivs d’infrastructura ni dil sistem da scola.
Co vinavon culla parcella Hess?
La vischnaunca ha acquistau la parcella Hess cun sia casa amiez il vitg da Mustér. «Il contract da cumpra, respectiv da vendita, ei semtgaus per suttascriver. Ils 28 d’uost 2026 organisein nus in’orientaziun e discussiun davart il diever futur da quella parcella. Parallelmein lein nus porscher la caschun d’indicar giavischs ed ideas sin ina plattafuorma digitala per in meins naven digl uost.» Quei ha il president communal René Epp detg il venderdis sera. Silsuenter duein investurs pusseivels vegnir plidentai. René Epp ha dilucidau la situaziun finanziala dalla vischnaunca e la strategia 2035: «Sper las investiziuns en gronds projects sco igl areal da scola, preveda la suprastonza communala era ina summa annuala dad in milliun francs per projects nunprevi.»
La finanziaziun dil hotel Acla da Fontauna ei garantida
Cun empau tensiun han las presentas ed ils presents alla sera d’informaziun il venderdis el Center Fontauna spitgau sin novitads davart il hotel Acla da Fontauna. Suenter ch’il baghetg vegl ei vegnius spazzaus avon treis onns setschenta naturalmein la damonda: Cu entscheivan las lavurs da baghegiar? Il president communal René Epp ha prelegiu ina declaronza dall’Immo Invest Partner SA, la possessura digl areal. Igl essenzial da quella: «La finanziaziun dil hotel Acla da Fontauna ei garantida.» Per las habitaziuns che vegnan erigidas sigl areal spel baghetg da hotel detti ei 200 interessentas ed interessents. Il proxim temps vegnien las contractivas cun quels terminadas. 20 milliuns francs hagi la societad gia investiu el project, denter auter cun spazzar quel, ereger la nova via pil quatier vischinont ni ella planisaziun. Tut en tut ein cuosts da rodund 100 milliuns francs previ per la surbaghegiada. In termin exact, cura che las lavurs da baghegiar entscheivien, ha René Epp buca saviu communicar. Sulettamein che las lavurs da scavament pils fundaments entscheivien aunc uonn. (fmr/hh)
Gust da leger dapli?