Topografia e vent ein ina sfida

Suenter che la vischnaunca da Mustér ha acceptau l’Ovra solara Magriel ils 22 d’october 2023 ha era la regenza grischuna approbau il project l’entschatta 2025. L’ovra da fotovoltaica vegn construida sut l’egida dall’Axpo. Al pei dalla Muota spel territori da skis a Mustér sin 2100 meters sur mar ed ina surfatscha da 13,5 hectaras duei vegnir baghegiau in implont cun ina prestaziun da rodund nov megawatt uras. Cun quel eis ei pusseivel da producir strusch 15 gigawatt uras energia electrica per onn. Quei corrispunda al consum da rodund 3000 casadas. L’energia duei star a disposiziun en emprema lingia al diever dallas Pendicularas Mustér SA. Las colligiaziuns alla reit d’electricitad che sesanflan gia el territori faciliteschan la realisaziun da quei implont. Sper l’Axpo ein era las Pendicularas Mustér SA participadas vid l’Ovra solara Magriel SA.

Spitgar sin resultats

«Il mument essan nus aunc ella fasa da studi dil sistem pigl indrez. Il terren fetg spundiv ed il vent ein ina sfida en quei territori», di Oliver Hugi, menader da Solar Svizra tier l’Axpo. Concret vul quei dir: Construir meisas cun moduls da fotovoltaica ei strusch pusseivel en quei territori fetg teis. «Per quei motiv sefatschentein nus il mument dalla tecnica d’ina construcziun cun sugas. Quella tecnologia lubescha da baghegiar in implont da fotovoltaica era en in liug spundiv», declara Oliver Hugi. Quella tecnica vegni gia applicada en auters loghens, mo buc en in territori alpin. «Dapresent vegn in implont cun quella construcziun examinaus a Grimentz el cantun Valleis», di Oliver Hugi.

Spitgar sin resultats

Quei mument ch’ils resultats digl implont da test a Grimentz ein avon maun sco era ulteriurs studis en connex cull’Ovra solara Magriel ein terminai, duei vegnir decidiu definitivamein davart la construcziun dall’ovra. Sco Oliver Hugi di, ei l’Axpo en stretg contact cullas Pendicularas Mustér SA e la vischnaunca da Mustér en quei connex. L’Axpo realisescha il mument in ulteriur implont da fotovoltaica sisum la Surselva. Buca lunsch naven dil mir da fermada da Nalps en Val Tujetsch construescha ella in’ovra che producescha la fin finala energia electrica per rodund 2000 casadas.

GIE a Magriel – NA a Run

Igl onn 2023 ein il cussegl da vischnaunca ed il suveran da Mustér sefatschentai da dus projects per implonts da fotovoltaica sin intschess dalla vischnaunca. Ferton ch’il cussegl da vischnaunca ha acceptau ton quel ch’era previus el territori dil Run sco quel a Magriel, ha il pievel priu in’autra decisiun. El ha refusau quel a Run numnaus «Solar Alpin Disentis», perencunter acceptau claramein quel a Magriel.