La quarta disditga en diesch onns
Markus Solinger banduna la Lia Rumantscha. Gia ils proxims dis chala il secretari general a lavurar, era sche ses engaschi dura anc fin l’october. La co-presidenta Urezza Famos explitgescha las raschuns. Markus Solinger n’è betg stà da cuntanscher per ina posiziun.
Urs Cadruvi ha chalà il 2017, Martin Gabriel il 2020, Diego Deplazes il 2022. Ed ussa sa metta era Markus Solinger en la fila dals secretaris generals che han bandunà entaifer gnanc diesch onns la Lia Rumantscha. La suprastanza ha communitgà il mardi (guarda box) che la sutga da schef vegn libra gia ils proxims dis.
Quant voluntaria che questa disditga è, n’è betg dal tut cler. La FMR ha empruvà da contactar il secretari general, ma na l’ha betg pudì cuntanscher. Urezza Famos, la co-presidenta da la Lia Rumantscha, dat pled e fatg en l’intervista. Ella explitgescha la vista da la suprastanza.
FMR: Entaifer diesch onns banduna ussa gia il quart secretari general la Lia Rumantscha. Tge n’è betg en urden?
Urezza Famos: Per las midadas d’avant diesch onns na poss jau betg discurrer. Nus essan dapi trais onns en in process da transfurmaziun, l’onn passà avain nus preschentà nossa nova strategia. Suenter avair francà la strategia, ans essan nus deditgads a la dumonda, tge structura ch’i dovra per implementar la strategia. Quest process avain nus fatg ensemen cun la direcziun e cun agid extern. Uschia essan nus vegnids ad ina structura che nus vulain uss implementar. En in tal process pon sa sviluppar differentas imaginaziuns co ch’i fiss da far.
Ha la suprastanza perquai relaschà Markus Solinger?
Nus na giain betg in or da l’auter en dispita. Markus Solinger n’è simplamain betg pront da purtar enavant la strategia. Las imaginaziuns co purtar enavant la Lia Rumantscha èn simplamain memia differentas. I dat ina sortida immediata dal secretari general. Il proxim pass è numnadamain che la suprastanza vul infurmar anc avant las vacanzas da stad davart il nov model per la Lia Rumantscha.
Co vesa il nov model ora?
Entaifer ils proxims diesch dis datti surlonder in’infurmaziun cumpletta.
E cura chala Markus Solinger sco secretari general?
Tenor il contract dura ses engaschi fin l’october. Ma el banduna la Chasa rumantscha en quests dis, subit cura ch’el ha fatg ina buna surdada e rumì ses biro.
È el pia «freigestellt» sco ch’ins di per tudestg?
Quel pled dovr’ins be cura ch’igl ha dà disfidanza envers ina persuna e quai n’è betg il cas. Ma i na fa betg senn ch’el resta anc sis mais en l’operativa, sch’el di ch’el na va betg d’accord cun il nov model.
Èsi stà in sbagl dad engaschar sco secretari ina persuna che n’enconuscha strusch la Rumantschia?
Markus Solinger ha purtà bunas chaussas en la Lia Rumantscha. El è era creschì si en il ravugl rumantsch, el viva parzialmain a Scuol ed è collià cun il ravugl rumantsch. Na, quai n’è betg stà ina faussa decisiun. Markus Solinger ha contribuì fermamain al svilup da l’organisaziun.
Èsi stà in sbagl dad engaschar in manager a la testa da questa instituziun empè da prender ina persuna da la cultura?
Quai na crai jau era betg. La Lia Rumantscha dovra tuttas qualificaziuns.
Tge dovri lura en l’avegnir? Savais Vus gia cun tge profil che la plazza vegn scritta ora?
Qua na dain nus per il mument naginas infurmaziuns. Quai segua cura che nus avain infurmà davart il nov model. Jau supplitgesch d’avair anc in pau pazienza.
Tenor communicaziun surpiglia la direcziun ussa la responsabladad per la Lia Rumantscha. Tge persunas èn insumma anc en la direcziun, sche Markus Solinger va?
Carmen Caspar, Andreas Gabriel e Silvio Dietrich.
Ma Silvio Dietrich chala gea era tar la Lia Rumantscha?
El resta anc fin il davos d’avust e gida ad implementar la nova structura. El è ina persuna impurtanta per il process da midada. Dal reminent: Quest process n’è betg dirigì da surengiu, mabain sa resulta da la savida dals collavuraturs, dad experts externs ed entras in’analisa approfundada. Ma sco ditg, quai explitgain nus proximamain.
Co vai cun ils collavuraturs e las collavuraturas en la Lia Rumantscha en vista a tut questas midadas da schefs?
Quai n’è segir betg flot – per nagin, ni per ils collavuraturs e las collavuraturas ni per la suprastanza. Nus avain ussa la situaziun che Markus Solinger banduna la Lia Rumantscha e nus ans chattain al final da quest process. Igl è d’avair in pau pazienza avant ch’ins tira faussas conclusiuns u pregiudizis senza avair enconuschientscha dal model che nus preschentain proximamain.
«Imaginaziuns divergentas» – Markus Solinger va
Suenter trais onns sco secretari general banduna Markus Solinger la Lia Rumantscha. La suprastanza engrazia ad el per ses grond engaschi. El haja contribuì ils davos onns fermamain al svilup da l’organisaziun, scriva la suprastanza en sia communicaziun dal mardi.
Markus Solinger è entrà en uffizi sco secretari general l’avust 2023. El haja contribuì ad elavurar la nova strategia da la Lia Rumantscha, quai saja succedì en stretga collavuraziun cun la suprastanza, la direcziun e la squadra, stat scrit en la communicaziun: «Però en vista ad imaginaziuns divergentas, co realisar la strategia e co cuntinuar a sviluppar l’organisaziun, vegn l’engaschament da Markus Solinger terminà.»
El vegnia a bandunar l’organisaziun ils proxims dis. Suenter las davosas surdadas surpiglia la direcziun la responsabladad per las fatschentas operativas. La FMR avess gugent publitgà era la vista da Markus Solinger. Fin la fin da redacziun il mardi saira n’èsi dentant betg stà pussaivel d’al cuntanscher.
Gust da leger dapli?