L’Hotel Linard nu vain listess na vendü
Ün on a la lunga d’eira l’Hotel Linard a Lavin in vendita. Üna gruppa d’abitantas ed abitants da Lavin vaiva chattà ün mecen ed üna fundaziun chi vessan sport man per surtour l’edifizi immez cumün. Il gestiunari actual ha uossa però decis da cuntinuar svess.
Als 2 lügl 2026 dess esser il nouv cumanzamaint dal vegl gestiunari in l’Hotel Linard. Lura voul l’unic hotel e restorant a Lavin lantschar üna «lunga stagiun cun bler vent frais-ch» chi dürarà fin in november. Sülla pagina d’internet da l’Hotel Linard vain quai annunzchà in ün «rapport da perspectiva» cul titel «Trar sü da nouv la vela». Quel rapport annunzcha eir l’intent d’etablir i’ls prossems quatter ons üna gestiun perdüraivla cun ün nouv concept: Quel skizzescha l’idea d’attrar üna nouva cliantella internaziunala ed eir d’ütilisar l’hotel sün Plazza Gronda per seguondas abitaziuns.
Il gestiunari ha müdà idea
L’annunzcha es bainschi eir üna surpraisa. Hans Schmid, l’hotelier chi ha gestiunà il Linard a Lavin ils ultims 20 ons, vaiva annunzchà la prümavaira passada da vulair surdar gestiun ed immobiglia in nouvs mans e vaiva instradà duos progets da derniera – «ottomesi» e «Café Bazzi» – per surmuntar il temp fin chi füss chattà üna successiun (guarda eir boxa).
«Nus laivan dar inavant l’impraisa per cha l’ospitalità sülla plazza da cumün cuntinua e viva inavant», disch Hans Schmid sün dumonda. «Uossa pigliaina svess per mans da fuormar l’avegnir, perquai chi nu s’ha per nus offri ün’otra perspectiva chi persvada.» I’l «rapport da perspectiva» scriva l’hotelier perquai eir: «La vendita es suspaisa.»
Davo duos epilogs vaja illa prolungaziun
Dürant raduond ün on d’eira l’Hotel Linard scrit oura per vender – e Hans Schmid vaiva in quel temp annunzchà duos epilogs davo raduond 20 ons sco hotelier a Lavin: Il prüm ün cumgià dad «ottomesi» – ün’ultima stagiun da stà. Als «ottomesi» es lura segui il «Café Bazzi» – üna gestiun inspirada dals cafes viennais cun sporta gastronomica plü simpla dürant la stagiun d’inviern. Pro l’annunzcha da quella d’eira l’intenziun da l’organisaziun portadra Pro Linard SA adüna amo da surdar la gestiun in nouvs mans. «I sto esser inchün chi nun ha be il flà per duos ons e lura as muossa chi nu d’eira daplü co be manià bain», vaiva Hans Schmid dit quella jada invers la FMR. E cha’ls interessents stopchan eir esser pronts da güdar a portar in möd substanzial la gestiun.
Ma «üna surdatta da l’affar Linard Lavin i’l sen da la publicaziun da la prümavaira 2025 nu daja uossa», annunzcha l’organisaziun portadra da l’hotel. Impè da’s retrar, augmainta Hans Schmid uossa perfin seis ingaschamaint. I’l «rapport da perspectiva» annunzcha’l i’l nom da l’organisaziun portadra ch’el surpigliarà sulet il timun: Gaby Schmid e Julian Karrer han tenor quel rapport surdat lur aczias cun dret da votar privilegià da la Pro Linard SA a Hans Schmid. Quella società posseda l’immobiglia immez cumün.
Administratur da trais immobiglias
Implü ha Hans Schmid surtut da Marianne Baumgartner e Luca Camponovo lur parts da la Chasün Sarl chi posseda l’immobiglia da l’anteriur Hotel Crusch Alba in cumün. Cun quai administrescha Hans Schmid in aigna redschia uossa totalmaing trais edifizis a Lavin: Sco terz amo la Chasa Bastiann i’l posess da la Bastiann SA, pro quella cha Hans Schmid es l’unic cusglier administrativ.
Il destin da l’unic hotel in cumün ha dürant l’ultim on eir occupà la populaziun. Davo l’annunzcha dals «ottomesi» as vaiva fuormada üna «Iniziativa Lavin». Quella vaiva organisà la prümavaira 2025 üna sairada per la populaziun per tscherchar propostas per üna successiun. Id es però restà pro ideas e ponderaziuns be vagas, l’ingaschamaint nun ha dürà lönch. Amo la stà han ils iniziants principals da quell’idea bandunà Lavin, la fin da l’on es la società gnüda scholta. (fmr/mst)
Ün intent concret ed üna proposta na trattada
«Quista decisiun es üna schanza manchantada», disch Kurt Reinhard da Lavin. Insembel cun üna gruppa d’abitantas ed abitantas vaiva el i’ls ultims mais tscherchà üna soluziun da successiun per l’Hotel Linard – e vairamaing eir chattà üna. Üna però chi nun ha apparaintamaing sdasdà l’interess da la gestiun actuala. «Nus nun eschan gnanca mai rivats al punct per far trattativas concretas», disch Kurt Reinhard.
Per quants raps chi va insomma, quai nun es cuntschaint publicamaing. Ün import concret nun es mai gnü nomnà, ne illa publicaziun da vendita, ne sün dumonda. Indizis sülla dimensiun finanziala dà il rendaquint 2025 da la Pro Linard SA, la società portadra. I’l bilantsch vain stipulada l’immobiglia da l’hotel cun üna valur da bundant 2,3 milliuns francs e las passivas a lunga vista, credits e l’ipoteca, cun bundant 1,5 milliuns francs.
In favrer da quist on as vaiva la gruppa intuorn Kurt Reinahrd drizzada insembel culla Fundaziun Edith Maryon da Basilea a Hans Schmid culla proposta, cha la fundaziun surpigliess l’immobiglia e l’hotel. «Per nus d’eira adüna cler cha nus spordschain, scha pussibel, man per sgürar il futur da l’Hotel Linard i’l cas cha Hans Schmid rafüda», disch Christoph Langscheid, mainagestiun da la Fundaziun Edith Maryon sün dumonda.
La Fundaziun Edith Maryon ha il scopo da retrar terrain da la speculaziun e da metter a disposiziun quel per spazi d’abitar pajabel o per progets socials e culturals. Tenor aignas indicaziuns possed’la eir fingià duos hotels in Svizra, respectivamaing pro ün il terrain. Fingià l’utuon passà vaiva la fundaziun confermà sün dumonda da la FMR seis interess da surtour l’immobiglia da l’Hotel Linard: «Premissa es chi vegnan insembel avuonda donaziuns.»
Ün mecen anonim ed ün’inquista in cumün
E quai paress vairamaing eir d’esser gratià. «Quist inviern vaina chattà ad inchün chi füss stat pront da regalar a la Fundaziun Edith Maryon ils raps per cumprar l’hotel», quinta Kurt Reinhard, «ma be scha la populaziun dal cumün voul quai.» Cha quai saja stat la premissa dal mecen – chi voul restar anonim – per ch’el fetscha la donaziun. «Id es üna persuna chi cugnuoscha il cumün, ma chi nu’s voul expuoner, neir na scha la vendita füss gratiada», disch Kurt Reinhard.
Per accumplir quella premissa hana fat üna sort inquista in cumün. Els laivan savair, scha las abitantas e’ls abitants chattan important cha l’albierg gnia mantgnü. E schi füssan eir pronts da s’ingaschar svess. «Nus eschan propa its da porta a porta per far nossa inquista», quinta Kurt Reinhard.
Uschea hana pudü notar sün lur glista cha quasi tuot il cumün chatta important da mantegner l’albierg sün Plazza Gronda. Intant cha’l grond sustegn principial pro quella dumonda nu sarà propa üna surpraisa, han 44 persunas eir dit chi füssan prontas da s’ingaschar activamaing. «Dad organisar gitas cun gianellas pels giasts d’hotel fin ad assistenza i’l restorant dürant la stagiun ota, sun gnüdas fattas da tuottas sorts propostas concretas per sustegner la gestiun.»
Skeptica invers l’idea d’üna cooperativa
Pel cas cha la cumprita füss gratiada, vaiva la gruppa intuorn Kurt Reinhard planisà da fundar üna cooperativa o ün consorzi cun persunas dal fat our da tuot las spartas necessarias per gestiunar ün hotel. «Quellas vessan lura elavurà culs nouv fittadins da l’hotel ün concept concret.» Per el e’ls co-iniziants füss quai stat üna schanza unica.
Ma apunta, il gestiunari ha decis da svess cuntinuar sco hotelier. «Nus stain uossa illa respunsabiltà», disch Hans Schmid. «L’idea d’üna gestiun organisada sco cooperativa para sül prüm sguard forsa simpatic. Ma in noss’incletta frena quella l’iniziativa d’impressari e nun es perquai a lunga vista nüzzaivla per la vitalità dal cumün.»
Üna tscherta skeptica invers quel model ha principialmaing eir la Fundaziun Edith Maryon. «Pro cooperativas es minchatant la dumonda chi chi surpiglia propa la respunsabiltà d’impressari», disch Christoph Langscheid, il mainagestiun da la Fundaziun Edith Maryon. «Ma nus vaivan fiduzcha illa gruppa intuorn Kurt Reinhard.»
Ed i’l cas cha quell’idea nu füss reuschida, stess la fundaziun svess illa respunsabiltà. «Lura vessan nus da pisserar per ün’otra ütilisaziun. Scha nus ans acquistain ün’immobiglia, surdaina quella o in dret da fabrica o cha nus dain a fit. Darcheu tilla vender o simplamaing laschar vöd nu pudaina tenor scopo da la fundaziun», disch Christoph Langscheid. In Engiadina posseda la Fundaziun Edith Maryon per exaimpel la parcella da la Scoula Libra a Scuol ed ün bain pauril a Chauennas tanter Scuol e Sent.
Seguondas abitaziuns per subvenziunar il restorant
L’idea da Hans Schmid per etablir i’ls prossems quatter ons üna gestiun perdüraivla va in ün’otra direcziun – e cuntegna eir üna reducziun da la sporta. Hotel e restorant saran averts quista stagiun da lügl fin november adüna da gövgia fin lündeschdi a mezdi. E la prosma stagiun da stà da mai fin december. Per la stagiun d’inviern gnia intant amo sviluppà ün format adattà, sta sülla pagina d’internet da l’hotel.
E suot il titel «müdamaint da paradigma» es i’l «rapport da perspectiva» circumscrit üna intant amo vaga idea da far render las trais immobiglias cha Hans Schmid posseda o administrescha cun «ün’ütilisaziun cun abitaziuns da residenza».
E suot il titel «müdamaint da paradigma» es i’l «rapport da perspectiva» circumscritta ün’idea intant amo dret vaga: Hans Schmid less far render sias trais immobiglias administrond quellas cun «ün’ütilisaziun cun abitaziuns da residenza» – in oters pleds cun seguondas abitaziuns. Sper l’Hotel Linard sun quai la Chasa Bastiann güst daspera e l’anteriur Hotel Crusch Alba, uossa nomnà Chasün ed ütilisà sco chasa da persunal.
Ch’üna gruppa d’impressaris da Turich skizzescha per la società portadra da l’hotel intant ün concept, sta il rapport. E cha’ls sclerimaints per la realisaziun düraran raduond ün on. Sün dumonda nu voul Hans Schmid intant amo explichar l’intent plü precis. Schi sun previssas abitaziuns da vacanzas, abitaziuns gestiunadas da l’hotel o schi vain ponderà eir la vendita da seguondas abitaziuns – quai resta pel mumaint avert. «I va per l’ütilisaziun tras glieud chi nun abita e nu lavura in cumün», disch Hans Schmid. «Cun abitaziuns da residenza as poja eir güdar a finanziar la gestiun dal restorant.» Ün restorant vital saja per el il minz d’ün concept cun avegnir, accentuescha Hans Schmid.
Gust da leger dapli?