Peter Peyer: En la regenza na faschain nus betg politica da partida. Nus empruvain da chattar bunas soluziuns per noss chantun. Cler che nus discutain bleras giadas fitg intensivamain ed or da differentas opticas. Igl è relevant d’avair pliras vistas cun differentas valurs en la regenza. Ins vegn elegì en la regenza cun in satgados politic, ma en l’executiva na datti nagina politica da partidas. La summa da tuttas valurs ed opiniuns è essenziala e perquai èsi giustifitgà che la partia socialdemocratica è era represchentada.

Jau hai anc adina plaschair da mia lavur sco cusseglier guvernativ. Ed jau avess grond plaschair da cuntinuar en il Departament da giustia, segirezza e sanadad. Da restar en il medem departament porta stabilitad al team ed er al gremi da la regenza. Ultra da quai datti insaquantas tematicas en quest departament che jau terminass gugent.

Jau vuless be dir che l’impressiun ch’i giaja be mal cun noss ospitals regiunals cugliuna mintgatant.Per exempel: Ils problems en l’ospital regiunal a Samedan han dominà fitg en ils rapports da las medias. Ma en tut quest temp èsi era vegnì lavurà en favur da l’avegnir da l’ospital da Samedan.

L’avegnir dals ospitals è in tema en l’entira Svizra. E jau chapesch ils quitads da blera glieud. Noss pensum sco chantun è da mussar che nus vulain salvar noss ospitals en las regiuns, e quai cun in bun provediment da basa. En l’avegnir vegni a dar uschenumnads models integrads, damai cun center e sut il tetg da quel en pliras instituziuns cun purschidas da sanadad. Percunter stuain nus ponderar da centralisar las prestaziuns che na vegnan betg duvradas avunda, pia da quellas che han bassas frequenzas en ils ospitals regiunals. In stretg connex cun la digren da las frequenzas ha la demografia futura ch’è fitg negativa en noss chantun. Da surmuntar quels obstachels è ina da nossas grondas sfidas dals proxims onns sin il sectur da la sanadad publica.

Recrutar avunda persunal per ils servetschs da tgira n’è betg simpel. Quai che fa quitads a mai è la votaziun dals 14 da zercladur 2026 davart la limita da 10 milliuns persunas en Svizra. Jau crai ch’i vegniss per nus problematic da mantegnair il provediment da sanadad sche quella iniziativa vegniss acceptada. Surtut en las valladas dal sid ed era en l’ospital chantunal essan nus dependents da forzas da lavur da l’exteriur. A nus mancan las forzas da lavur giuvnas indigenas.

Las persunas arrestadas en l’Italia ed en la Frantscha han ina permissiun da dimora tar nus en il Grischun, e quai tranter auter a Roveredo. La criminalitad organisada è deplorablamain da chasa en l’entira Svizra. Per avair success cun arrestar ils malfatschents èsi impurtant ch’ils organs da polizia e d’inquisiziun transcunfinals, damai dals chantuns e dals pajais vischinants, collavureschian. Da l’autra vart mussa gist quest cas da Roveredo che nus en il Grischun stuain esser attents cura che persunas dumondan ina permissiun u cura ch’ellas avran u entschaivan in affar. Qua èn differents uffizis chantunals e las vischnancas participadas. En l’avegnir stuain nus procurar che tut ils acturs da differents departaments chantunals, vischnancas e la Confederaziun collavureschian meglier.

Sche jau vegn reelegì dependi schebain la regenza nova è d’accord che jau cuntinuesch en mes departament da fin qua. La sanadad publica vegn ad esser in grond tema ils proxims quatter onns. Ussa avain nus gist preschentà il maletg directiv chantunal da sanadad. A quest maletg directiv suonda la planisaziun dals ospitals per ils proxims onns. Quai vegn ad esser in grond pensum. L’autra gronda incumbensa è la giustia dal Grischun. Il Cussegl grond vegn a tractar ina ulteriura refurma da las dretgiras cun ina eventuala organisaziun nova da las dretgiras regiunalas. Sco cusseglier guvernativ en il gremi da la regenza èsi da viver cun ils temps instabils sin l’entir mund. Era il Grischun vegn a sentir las consequenzas da quella instabilitad. I vala d’esser preparà.