Ils emprims da prest 2,2 milliuns culps

Bler travagl ier a partir da las 08.00 a Cuira al stand da tir Rossboden. La raschun è il tir d’avertura da la 59avla Festa federala da tir 2026. Durant in mais è il focus da sport sin il Grischun cun avair lieu per la quarta giada la concurrenza da tir naziunala en noss chantun. Durant la Festa federala da tir l’onn 2015 en il Vallais è il cusseglier naziunal Christoph Darbellay, il president dal comité d’organisaziun stà da l’avis che fiss temp ch’il Grischun organisass puspè suenter 1985 e suenter 40 onns l’occurrenza da tir naziunala. Intgins Grischuns, sco per exempel era cusseglier naziunal Martin Candinas, han chatta l’idea da Darbellay betg uschè mala ed era realisabla. Cunzunt Carl Frischknecht, da lez temp president da l’Associaziun da tir grischuna ed er autras persunas han chattà quai ina buna chaussa. Suenter lavur intensiva da tschintg onns èsi uschè lunsch ed ier è gia vegnì dà l’emprim culp da la Festa federala da tir 2026 – l’emprim da bunamain 2,2 milliuns. Per Candinas e per Frischknecht e bleras autras persunas è quai stà in mument extraordinari.

Cuntent cun l’entschatta

Ina da las pli impurtantas persunas dals radund 5000 voluntaris e voluntarias è Barcli Venzin, il tiradur sursilvan. En il Grischun tutga el tar in dals megliers matscheurs. Uschia enconuscha el natiralmain l’entir manaschi da tir e cunzunt er il stand da tir dal Rossboden. Barcli Venzin è responsabel sin quel implant da tir durant la festa federala da tir per il funcziunament dal tir sin la distanza da 300 meters. Envers la FMR ha el ditg che la prioritad la pli impurtanta saja la segirezza en il stand. El saja cuntent cun l’entschatta da l’occurrenza naziunala da tir. «La damaun avain nus gì intgins problems tecnics pli pitschens, dentant senza gronda influenza sin il tir sez», ha menziunà Venzin. En cas d’in incap tecnic saja er pussaivel da leger en a maun il stetg, quai che saja lura vegnì fatg. Per il Sursilvan èsi fitg relevant ed er necessari, sch’igl capita in sbagl, da discurrer cun il tiradur ubain la tiradura e dad esser gidaivel, gentil e pront da schliar il problem. Quai saja impurtant, uschia Barcli Venzin. Cun ina calma segna il Sursilvan per la survista dal manaschi da tir al Rossboden cun total 48 schibas.

30 culps en quatter minutas

Tratg il tir d’avertura han lura 1600 tiradurs e tiraduras. Sajettà èn vegnids suenter duas provas gist 30 culps en seria en in temp da be quatter minutas. Quai vul dir che per culp ha in participant ubain ina participanta gì il pli bler otg secundas. Tratg è vegnì sin la schiba da diesch. Intgins tiradurs han sajettà 270 puncts, quai ch’è lura in resultat excellent. A partir dad oz vegnan lura sajettads sin la distanza da 300 meters ils diesch stetgs, quai tenor annunzia da mintga participant e participanta. Sajettà vegni lura er sin las distanzas da 10, 25 e 50 meters, quai per gronda part a Cuira.