Discussiun davart in parc naziunal da flums

La Fundaziun Greina festivescha il giubileum da 40 onns. Quei fa ella cun in arranschament che cuoza dus dis, numnadamein ils 12 e 13 da zercladur 2026 ella claustra a Mustér. Il tema empalont da quels dus dis ei «Nos flums ella transformaziun: Capir ed agir». El center dalla sentupada stattan las sfidas actualas e las perspectivas dils flums alpins.

Engaschi dapi 40 onns

Dapi 40 onns s’engascha la Fundaziun Greina per la protecziun da cuntradas natiralas unicas en Svizra. Sco la fundaziun scriva en ina communicaziun als mieds da massa, vul ella dar in sguard anavos sil contonschiu ed in anavon el rom dalla fiasta da giubileum. Ella vul far quei surtut en vesta al stan ed il svilup dils flums alpins. Il giubileum entscheiva venderdis, ils 12 da zercladur 2026 allas 14.30 cull’avertura ufficiala cumbinada cul plaid da beinvegni da Reto Wehrli, president dalla Fundaziun Greina ed anteriur cusseglier naziunal. En dus referats dilucideschan experts la situaziun actuala ed il svilup futur dils flums. Bernhard Wehrli dall’Universitad Turitg dat in’investa el stan dils flums alpins en Svizra. Timo Ryhner dalla Fundaziun Greina presenta emprems resultats dil project ALPEX pertuccont la biodiversitad e la midada dil clima ellas Alps.

Parc naziunal da flums?

Suenter ils referats suonda ina discussiun al podi cun representantas e representants dalla scienzia, politica ed administraziun federala. En quella vegn tematisada la damonda, co in parc naziunal da flums en Svizra savess daventar realitad. Sco la Fundaziun Greina scriva, duein ils dus dis da giubileum era porscher la caschun da s’entupar e da cultura. Quei duei succeder denter auter el rom d’ina tscheina cun accumpignament musical cul duo Dario Hess & Martin Gugger. Ina part dalla purschida dalla sera ei era la presentaziun dil film documentar «Greina» cun discussiun suandonta cul regissur Patrick Thurston. La sonda, ils 13 da zercladur 2026 stat ell’enzenna d’ina excursiun communabla ni la viseta d’in museum, gest tenor cundiziuns dall’aura.

Finamira protecziun dalla Greina

La Fundaziun Greina ei vegnida fundada avon 40 onns cugl intent da proteger la Greina. Ils onns 1980 deva ei numnadamein plans per inundar il Plaun la Greina cun in lag da fermada. In lag havess disfatg cumpleinamein quella cuntrada alpina fascinonta sin 2200 meters sur mar al cunfin dils cantuns Grischun e Tessin. Persunas da vischnauncas pertuccadas e vischinontas sco era defensuras e defensurs dalla natira ein seformai per cumbatter ils plans. La fin finala ei vegniu desistiu dil project pil lag da fermada. Ord quei moviment en favur dalla Greina ei lu naschida la fundaziun igl onn 1986. Siu engaschament ha lu era mussau effect. Dapi biars onns obtegnan las vischnauncas da Vrin e Sumvitg contribuziuns federalas per haver desistiu dil nez dallas auas. Dapi 1995 ei quei fixau ella lescha.