Il schigentamauns sin la smarschanera
Finalmein vacanzas. Duront negin temps digl onn ei quella construcziun aschi populara sco las proximas jamnas. Igl ideal ei daus: Ussa vegn ei pli ruasseivel. Negins termins, negin’agenda che pretenda da nus enzatgei. Nus prendein avon da leger dapli, durmir, magliar ed insumma dad haver dapli temps per quei ch’ins ha stuschau ora el mintgadi. Quei cun la stgisa ch’ins fetschi quei duront las vacanzas. Nus cartein che tut vegni pli bi e meglier sche nus havein vacanzas. Aschia silmeins noss’illusiun. L’encorunaziun dallas vacanzas ei per biars lu arrivada, cu els schain sper la mar ni sper in pool.
E gest leu, al pool ni alla riva dalla mar, survegn quella libertad gia la damaun marvegl in gust da concurrenza: Leu ein las smarschaneras savens gia occupadas avon ch’enzatgi seigi propi leu. In schigentamauns, ina revista, forsa ina crema da sulegl. Dapli drova ei buca per schar saver ils auters: Quei ei il miu. Il carstgaun sez ei lunsch naven – probabel al buffet da solver, ni puspei en combra vida durmir ni schizun zanua vida far in’excursiun. Mo il segn ei mess: Quei plaz ei mes, jeu vegn forsa pli tard. Ni insumma buc. Pli tard, cura ch’ils hosps civilisai arrivan: smarschaneras occupadas da negin, denton reservadas. Ed era sch’ils hosps arrivan aunc el decuors dil di, vegnan bia smarschaneras savens buca duvradas per leger ni per recrear – anzi, pil pli ei il nas al natel e sch’ins ha propi grond cletg, vegn tedlau dretg e seniester dad ault musica ni telefonau igl entir benediu di. Pia il carstgaun ei presents corporalmein – il spért ei denton absents. E sil pli tard en quei mument ein ils ideals dallas vacanzas sil funs dalla mar ni dil pool.
Forsa ei quei il spért dil temps en miniatura. Buca mo pervia dalla smarschanera, mobein pervia dil patratg davostier: Jeu sun buca cheu, mo jeu vi tuttina haver miu plaz. Jeu drovel el forsa pli tard. Ni forsa insumma buc. Denton ussa quenta miu basegns. Il schigentamauns ei buca mo in toc teila. El daventa in segn per nossa tema da vegnir alla cuorta. Nus reservein, nus tenin liber, nus savein strusch schar enzatgei senza controlla. Era leu nua che nus havessen finalmein temps, ruaus e spazi, prendein nus cun nus la logica dil mintgadi.
Mo forsa ei quei era buca mo egoissem. Biars vegnan en vacanzas cun il tgau aunc plein termins, obligaziuns e tensiun. Tgi che ha adina giu il sentiment da stuer mirar per sesez, sa buca semplamein dar giu quella moda da viver alla recepziun.
Forsa entscheivan las veras vacanzas pér cura che nus savein mirar sin ina smarschanera libra, senza immediat prender possess dad ella. Cura che nus capin che ruaus ei buca mo quei che jeu survegn, mobein era quei che jeu laschel als auters.
Il schigentamauns sin la smarschanera ei ina pintga caussa. Mo mintgaton tradeschan las caussas pintgas il pli bia. E forsa fuss quei ina buna resoluziun per questa stad: Prender cun nus buca mo cudisch e crema da sulegl, mobein era empau risguard – ed oravontut levezia.
Gust da leger dapli?