25 onns ensemen
La primavera 2001 han il CB Lumnezia ed il CB Vella fusiunau. Quei ei stau avon 25 onns e las sportistas ed ils sportists lumnezians han vuliu festivar quei tierm. Els han fatg quei silla plazza da ballapei Bual a Vella cun in program per pign e grond.
«Dar ballapei ei il meglier sport d’equipa ch’ei dat», ha in visitader manegiau sonda silla plazza da ballapei a Vella. Leu ha il CB Lumnezia envidau la populaziun al giubileum da 25 onns. Gl’um sils onns che ha ludau il ballapei sco part impurtonta dil temps liber ei buca staus il sulet da quei meini.
Cuorer suenter alla culla
El decuors dil suentermiezgi ha in auter visitader raquintau alla FMR co el devi pli baul ballapei cun ses frars e co els mavien dumengia per dumengia d’in turnier da grümpel a tschel. Igl era ils onns ch’ins haveva liber mo la dumengia e visitar in grümpel enzatgei fetg popular. Ils babs havevan denton nuota schi bugen ch’ils buobs e mats s’absentavan per ir a cuorer suenter ad ina balla ni – sco ils Lumnezians gin – ina culla.
Tochen ils onns tschunconta deva ei els vitgs muntagnards nuot auter che luvrar ni emigrar. Temps liber enconuschev’ins buc. La generaziun giuvna ha denton entschiet a selubir a sesez empau temps liber. Ina ha entschiet ad ir cun skis e dar ballapei. E fundar uniuns e clubs.
In turnier per e cun pign e grond
Talas reminiscenzas ha negin nudau. Igl ei remarcas ch’ins auda en discuors cun glieud che ha vargau sissont’onns. Oz ei ballapei dagitg il sport il pli popular – aschia era en Lumnezia. Ed oz secapescha ei da sesez che mattatschas dattan era ballapei. Sonda ein buobs e mattatschas separticipai al program festiv 25 onns CB Lumnezia. Ils organisaturs han purschiu in turnier per pign e grond, ustria cun grilladas sco era giugs d’inschign culla balla. Aposta per la fiasta ha il club montau ina tenda.
Che ballapei seigi il sport d’equipa pli popular ei stau il motto dil gi. Allas 10.00 ha il turnier per pign e grond entschiet. Ils organisaturs havevan formau las equipas cun carschi ed affons che han dau ensemen. In giug cun duas equipas ha cuzzau mintgamai 15 minutas.
In persul sa buca gudignar
Suenter il final dil turnier ha la fiasta cuntinuau cun in giug dallas «legendas». Ils dus rivals d’antruras che devan campiunadi, il CB Vella ed il CB Degen resp. CB Lumnezia, han dau in «derby». Silla plazza a Vella ein las rivalitads dagitg emblidadas e la fusiun ha nuau aunc pli ferm ils ligioms. Oz ei il CBL ina squadra cun glieud da Vrin tochen Cumbel. L’uniun dumbra actualmein 40 commembers activs, 50 juniors e rodund 1000 passivs. El s’engascha per ina purschida che fa senn.
Sco ils affons lumnezians van oz a scola ensemen, fan els era sport ensemen, seigi sin skis, silla plazza da ballapei, cun velo ni auters sports. Il motto dil club da ballapei CBL ei significonts: plascher – respect – success. Ch’il sport da ballapei seigi il meglier sport d’equipa laian ils adherents da hockey ni d’autras disciplinas secapescha buca valer. En scadin cass ei ballapei il sport popular pli derasau sil globus. Ins empren buca mo da gudignar, mobein era da spiarder, da cooperar e respectar. In giugadur persul sa buca gudignar. Il club lumnezian porscha dapi questa primavera ina specialitad per sesez: Fabiana Capaul tegn numnadamein ensemen, sco presidenta, las hottas dil CBL.
Ord la historia dil CB Lumnezia
Ils onns tschunconta han ils da Degen fundau il club da skis. La stad devan els ballapei. Il plaun davos la caplutta da sogn Bistgaun s’adattava sco negliu auter en Lumnezia per quell’occupaziun. Gl’onn 1961 ha l’uniun sportiva formau ina equipa da ballapei ed in onn pli tard ei quella separticipada l’emprema gada alla cuppa grischuna. Sco quei ch’ins sa leger el cudisch dalla historia da Degen (ediziun 1996), han ils adherents fundau 1973 il club da ballapei Degen. Els han stuiu far quei quei per retscheiver contribuziuns da cantun e confederaziun. Lur finamira era numnadamein d’aquistar terren e da baghegiar ina dretga plazza da ballapei. Dapi la stagiun 1980/81 han ils da Degen priu part al campiunadi grischun ed adina giugau ella 4. Ligia. Era giugadurs d’auters vitgs giugavan cun Degen aschia ch’il club ha midau 1992 il num sin Club da ballapei Lumnezia. «Cheutras duess ei esser pusseivel per l’entira val da s’identificar cul club.
Ella capitala vischinonta ha Marcel Casanova, ensemen cun in triep da sportists ambiziuns, fundau 1975 il Club da ballapei Vella. L’uniun sportiva haveva organisau gl’unviern sur il vitg ina cuorsa da skis e dil daner da partenza era vanzada ina summa daners. Igl ei stau il fondo pil club da ballapei. 1980/81 ein era ils da Vella separticipai al campiunadi grischun. Ils giugs da casa stuevan els denton dar ordeifer la Lumnezia – perquei ch’ils da Degen duvravan sezs la plazza pils giugs da campiunadi. La promtadad da s’organisar e da setener ensemen enteifer la vallada ei vegnida la finala 2001, cu ils dus clubs han decidiu da fusiunar. Igl ei stau clar ch’ins ei setenius vid il num «CB Lumnezia».
Gust da leger dapli?