Resgüm ed entusiassem per la festa da luotta

Amo in gövgia a bunura d’eira be ün prà majer, sül qual i creschan tanter l’erba bassa intant pür ün pêr pacas paparellas. Fin in sonda però as transmüda quel prà güst sper la staziun da muntogna da la pendiculara Motta Naluns in ün lö da festa per passa tschient luottaders e millis spectaturas e spectaturs – per la prüma festa chantunala da luotta in Engiadina Bassa e la plü ota in Svizra.

Ün’arena sün 2150 m s.m.

I’ls prossems dis vegnan per quella fabrichadas sü tschinch tribünas, duos tendas da festa, installaziuns sanitaras, stands da vendita ed üna bar – e natüralmaing ils rinchs da resgüm. Quatter da quels vegnan miss ad ir sün 2150 meters sur mar: cun ün diameter da 12 meters ed üna vetta da resgüm applanida d’almain 15 cm tenor reglamaint da l’Associaziun federala da la luotta svizra. «I douvra per mincha rinch var 23 meters cubics resgüm», disch Michi Beer, il president da la Società da luotta Engiadina e vicepresident dal comitè d’organisaziun. Var 100 meters cubics o raduond 30 tonnas resgüm hana cun quatter chargias da tractor e camiun dimena stuvü transportar sü La Motta.

Quel resgüm es insè ün prodot da s-chart da las lavurs illa marangunaria dal vicepresident a Ramosch. «Il resgüm deriva da laina our dals gods da Valsot. I’m fa plaschair cha quel vain quia amo üna jada ütilisà, normalmaing til staina allontanar.» Ed il savur tradischa: sper tieu, pin e larsch cuntegna il resgüm eir lain da dschember. «Quai sun ils avanzs da la laina cha nus vain elavurà illas ultimas eivnas – e là d’eira oramai lapro eir dschember», disch Michi Beer.

Sco respunsabel da la logistica pissera el quist’eivna ch’intuorn ils quatter rinchs da resgüm as fuorma l’areal da la prüma festa da luotta in Engiadina Bassa. «Las tribünas han üna capacità da 1000 plazzas, sül prà mettaina ad ir ulteriuras 1000 plazzas da sezzer e lura daja amo plazzas per star in pè. Tuot in tuot faina quint cun var 2500 fin 3000 persunas a la festa.»

Pro da quellas schurmas da persunas nu bastessan ils indriz gastronomics e sanitars chi sun avant man pro la staziun e’l restorant da muntogna. «Ma nus profitain ferm da l’infrastructura dal territori da skis», disch Michi Beer be istess. Uschea pona per exaimpel tachar lur installaziuns sanitaras vi da la chanalisaziun chi’d es fingià avant man. O lura ütilisar l’edifizi da la scoula da skis pel provedimaint d’urgenza dals atlets cha’l center da sandà CSEB garantischa dürant la festa. 

Entusiassem per ün sport amo pac etabli illa regiun

«Nus eschan pronts», disch Reto Rauch, il president dal comitè d’organisaziun. Avant trais ons ha el surtut quel post, dürant circa ün on hana uossa organisà e preparà activamaing la prüma festa da luotta chantunala in Engiadina Bassa. Ed eir Michi Beer respuonda a la dumonda sch’el saja nervus be loc: «Na na, eu sun tuot calm. Nus ans pudain fidar dad uschè blera glieud chi’d es solidarica ed ans sustegna.»

Tenor ils organisaturs s’ingaschan vers 300 voluntarias e voluntaris per l’organisaziun da la festa. «Nus nu vain gnü ingüna difficultà da chattar glieud chi ans sustegna cun ün ingaschamaint voluntari», disch Michi Beer. «Per la gronda part es quai glieud da quia, ma eir giasts regulars ans güdan.»

Eir il president dal comitè d’organisaziun fa quint cun ün rebomb trasoura positiv intant, grazcha al grond sustegn illa regiun. «Fin uossa nun ha l’Engiadina Bassa üna gronda tradiziun da luotta», disch Reto Rauch, «ma eu crai cha nus hajan cun quista festa eir dat ün nouv impuls e svaglià ün pa l’entusiassem per quista tradiziun.»

Quai as spievla eir illa prevendita dals bigliets, ingio chi nu’s po fingià na plü cumprar bigliets per la tribüna o plazzas da sezzer. «Ouravant ans vaivna dit cha nossa tribüna saja forsa plütöst ün pa surdimensiunada per uschè üna festa, ma nus tilla vain lura dafatta amo ingrondida davopro in vista al grond interess.»

Sper la festa da luotta in sonda ha in dumengia lö sü La Motta eir amo la luotta dals puobs (Buabaschwinget). «Uossa spettaina vairamaing be amo la bell’ora», conclüda Michi Beer.