In matg cun «fluras» frestgas

Dumengia ha il Chor Uvriu Danis-Tavanasa buca concludiu gl’onn da cant, denton ha el finiu il project da giubileum cun in concert. Il project ha entschiet suenter Daniev cun entscheiver ad organisar ils termins per la commemoraziun da 20 onns. L’emprema part ei stada ina pintga turnea a Zuoz, Vignogn ed ella baselgia parochiala a Danis. Als treis concerts ha il chor mirau anavos, el ha cantau ils «hits» ch’el ha produciu dapi la fundaziun il 2006. Igl ei stau in seregurdar – cun canzuns – dils bials muments, da fiastas, registraziuns e projects. Ussa, ella secunda part, ha il Chor Uvriu vuliu mirar anavon el futur. La fin d’jamna dils 6 e 7 da zercladur 2026 ha el gest procurau per litteratura corrispundenta.

In project pil futur

La suprastonza dil chor, culla presidenta Daniela Hefti-Cavigelli, l’actuara Andrea Cathomas-Friberg e la cassiera Patricia Derungs-Carigiet, ha formau il comité pil project ambizius. «Nus vulein appreziar las prestaziuns dil vargau, denton era mantener l’ierta musicala da nossa vischnaunca e dar in sguard el futur», han ellas scret el plaid final dalla broschura festiva per sponsurs e fauturs. Dapi 2006 seigi il chor sesviluppaus cuntinuadamein ed astgi cantar oz sin in ault nivel per in chor dil vitg. Las 31 cantaduras e cantadurs gaudien da far ensemen musica e star da cumpignia, aschia la suprastonza dil chor. Ina persuna che ha animau e motivau las cantaduras ed ils cantadurs ei il dirigent Daniel Pally. Quel ha surpriu 2006 la bitgetta ed ha era dirigiu il concert pil giubileum da 20 onns.

L’idea da crear enzatgei niev ha il chor fatg cun agid da cumponists dalla regiun. Quels dueigien metter en musica vocala texts da poets oriunds dalla vischnaunca da Breil. Sonda e dumengia ha gl’auditori saviu tedlar il resultat, numnadamein in concert cun diesch premaudiziuns. Marco Nay, in representant dalla generaziun giuvna, ha moderau il concert. El ha fatg quei da maniera simpatica ed informativa. Buca memia liungas presentaziuns ha el fatg, gest avunda per emprender d’enconuscher poet e cumponist (mira scaffa).

Quater poesias dad Alexander Maissen

A mintgina dallas diesch cumposiziuns novas ha il chor dau caracter. Als dus concerts ei la maioritad dils otg cumponists stada presenta. Els havevan buc udiu avon co il «matg da fluras frestgas» tuna. Ch’il Chor Uvriu ed il dirigent dettien peisa all’interpretaziun dallas canzuns novas, han els saviu. Il Chor Uvriu ei numnadamein returnaus il zercladur 2024 dalla fiasta da cant districtuala a Trun cun ina predicat «excellent». Ton ils cumponists sco gl’auditori han pia giu ina certa garanzia da qualitad.

Las mattas da Cantus Avis, sut la direcziun da Rilana Cadruvi, han accentuau la vesta giuvenila, quella dil futur dil cant vocal. Giuletta Barenius, Anna Catrina Scherrer, Felissia Candinas, Maura Senn, Mona Senn, Clara Maria Scherrer ed Eva Luisa Scherrer han presentau canzuns variontas en differents lungatgs. Aschia ei il concert giubilar staus in’occurrenza che fa speronza pil futur dalla cultura cantica. La dieschavla premaudiziun cul tetel «siemi», ina cumposiziun da Gion Andrea Casanova cun text dad Alexander Maissen, ha il Chor Uvriu cantau ensemen cullas siat cantaduras da Cantus Avis. Il poet ha semiau ch’el seigi ius pil mund entuorn ed arrivaus tochen avon il portal dil parvis. «Has tscheugiu aunc buca finiu», hagi sogn Pieder manegiau e tarmess engiu el cull’empermischun ch’el arvi lu l’autra gada. Alexander Maissen ei morts avon treis onns ella vegliadetgna da 96 onns. Quater dallas diesch premaudiziuns sebasan sin poesias ch’igl anteriur veterinari oriunds da Dardin ha publicau 2016 el Tschespet 76.