Colurs, pials, lenn vegl e motivs d’animals

Il hotel Ucliva a Vuorz ei enconuschents per sia filosofia e purschida natirala e regiunala. El persequitescha ils aspects ecologics e persistents. L’exposiziun cun ovras da Judith Brennwald che habitescha da l’autra vart dalla Surselva a Flond, va bein aprau culla filosofia dil hotel Ucliva. Igl artisanadi dall’artista ei certificaus d’Alpinavera. Il certificat oblighescha denter auter da luvrar cun material dalla regiun.

Nezegiar las resursas

Da veser entochen ils 25 d’october 2026 el hotel Ucliva ein 20 maletgs d’animals da Judith Brennwald. Leutier expona ella nuorsas tagliadas ord lenn schiember. Lur tgierp ei surtratgs cun peils natirals da nuorsas. «Quella pial fuss vegnida dismessa. Il medem vala per las pials d’armauls ch’jeu nezegel en cumbinaziun cun mes maletgs», di l’artista. Ella seigi carschida si en in contuorn puril a Turitg e hagi empriu gia baul d’appreziar quei che la natira porscha. «Armauls furneschan buca mo carn e latg a nus. Era la pial, respectivamein il peil, ei ina part dad els che nus savein nezegiar», di l’artista. En quei grau sappien nus prender in exempel dils Indians.

Luvrau cun 12 peils el Canada

Dapi 20 onns va Judith Brennwald ina via d’artisanadi tut speciala. «Suenter haver luvrau biars onns sco graficra vai jeu tschercau ina nova sfida», di ella. In maletg d’armauls dil raz d’Angus ha ella cumbinau cun in fol da quels. «2009 hai jeu exponiu l’emprema ga mias ovras ell’Engiadina. La reacziun dalla glieud ei stada differenta. Mo en quei connex ei sesaviarta la porta da serender el Canada en in menaschi cun armauls», seregorda ella. Leu ha ella luvrau cun 12 peils pizzi d’armauls, ha cumbinau maletgs cun quels. Ils onns suandonts eis ella s’identificada pli e pli cun quella filosofia d’art.

La precisiun dalla graficra

Ils maletgs exponi el hotel Ucliva dattan in schatg dalla lavur da Judith Brennwald. Els muossan buca mo l’exactadad da figurar il pli davos detagl dils animals – seigi tscharvas, lieurs, cots selvadis ni asens – mo era da metter ils maletgs perfetgamein en scena. Per part fa ella quei cun ramas cun lenn da baghetgs spazzai. «Lenna veglia ei empau sco la pial dils animals. Bia da quei sa vegnir nezegiau vinavon», puntuescha l’artista. Lenn vegl e pials ein ina part da siu art aschi bein sco las colurs e sco graficra procura ella per la cumbinaziun che fa la fin finala singulara sia lavur. En siu atelier a Flond lavura Judith Brennwald era vid lavurs sin incarica: «Per exempel cun fols da selvaschina sittada da catschaduras e catschadurs cumbinai cun in portret digl animal. Bein enqualin ha aschia ina biala regurdientscha digl animal sittau.»

La muntanera da nuorsas

Ils maletgs d’animals fuorman bein la part principala dallas ovras da Judith Brennwald che ha exponiu sias lavurs ils davos onns en plirs loghens. Ella ha denton era scaffiu in sortiment da nuorsas ch’ella taglia ord lenn schiember. Ellas ein surtratgas cun in peil nuorsa da purs ella vischinonza e per part coluradas mudestamein. Era per quellas nezegia ella buc il lenn d’emprema qualitad, mobein lenn da meins buna qualitad, mo ch’ei tonaton era in product dalla natira «Da quellas nuorsas meinel jeu era in cudisch da muntanera che cuntegn ussa gia 150 tocs. Mintgina ei in unicat – seigi Quirin, Ladina ni Gian Luca – e tscherca in dacasa», di l’artista.

Steilalva ord lenn

Judith Brennwald entaglia denton buca mo nuorsas ord lenn, mobein era flurs steilalva. Suenter ina lavur cun bia pazienzia cun cunti sepresentan flurs en lenn en ina fuorma eleganta. Sin sia homepage san ins leger: «La steilalva ei il simbol per curascha, valerusadad e carezia. Ella ei sut protecziun, mo ord lenn eis ella in present singular.» Judith Brennwald ha dil reminent giu duas ga la caschun da formar marcas postalas per la Svizra, ina ga per cuviartas premarcadas.