Il «filet» vegn survius

«Visavi la populaziun eis ei in signal che zatgei marscha en caussa areal Maissen», declara il president communal dad Ilanz/Glion, Marcus Beer. La populaziun spetga effectivamein sin tals signals, pertgei ils 9 da fevrer 2025 ha il pievel all’urna lubiu en quei connex ina investiziun pli gronda. All’urna ha el approbau la damonda da cumprar dalla Repower gl’areal Maissen per 5,65 milliuns francs. La midada da maun ei buca stada dispiteivla, pertgei naven dall’entschatta ha la vischnaunca communicau daco ch’ins vegli vegnir en possess dalla parcella. Finamira eis ei da scaffir spazi da habitar.

Parcella vegn buca vendida

Parlament e suprastonza communala havevan proponiu da far diever dil dretg da precumpra ed il pievel ha dau suatientscha a quel. Ussa astga gl’areal Maissen egl ost dil marcau da Glion buca restar memia ditg vits e libers. Conform alla cumpra ha la suprastonza cuntinuau sias preparativas da surbaghegiar la parcella nr. 485 situada denter il hotel Eden e la riva dil Glogn. «Ei dat negina parcella ella zona da baghegiar ch’ei pli centrala che quella», declara il commember dil directori dall’administraziun communala, Andreas Pfister. La documentaziun «areal Maissen» accumpogna el dapi otg onns. Andreas Pfister conferma che ha la suprastonza ha lubiu margis vargau il concept per offerir la surfatscha als investurs. «La parcella vegn buca vendida, mobein dada giu el dretg da baghegiar», puntuescha Andreas Pfister. Quella cundiziun ston investurs interessai saver.

69 habitaziuns

Suenter che la «regenza» dalla vischnaunca Ilanz/Glion ha decidiu da lantschar la concurrenza d’investurs, ha ella publicau ina documentaziun digl areal Maissen. Tenor il fegl culs facts san ils investurs realisar naven digl atun 2028 la surbaghegiada conform al plan da quatier che vala per quella zona. La davosa proprietaria, la Repower, haveva schau elaborar l’investura RLC da Sogn Gagl in  project directiv.Quel indichescha en tgei direcziun che la surbaghegiada duei ir.

Ussa, che l’entira planisaziun ei suttetg e lubida, definescha il plan da quatier l’utilisaziun: En tut san ils investurs baghegiar sis casas cun totalmein 69 habitaziuns e spazi per survetschs e mistregn. «El senn d’ina attractiva politica da habitaziuns havein nus decidiu da garantir sigl areal Maissen ina utilisaziun mischedada», renda il president communal Marcus Beer attent. El manegia habitaziuns per famiglias, carstgauns giuvens, senioras e seniors, persunas beinsituadas finanzialmein e persunas cun dameins entradas sco era emploiai che lavuran ella regiun.

Schanza creativa

Per realisar quella cundiziun enquera la vischnaunca in investur pli grond che surpren il tgamun enten realisar in project. « Igl ei denton previu ch’era societads pli pintgas san far part dil svilup », puntuescha Andreas Pfister. Per cassas da pensiun, grondas interpresas specialisadas ni instituziuns che administreschan facultads ei gl’areal Maissen a Glion ina schanza. Pertgei la parcella en liug central, gest sper ils binaris dil traffic public e tuttina agl ur dil marcau da Glion, ei semtgada immediatamein.

A societads cun capital, segiradas ni cassas dil provediment professiunal, seporscha in spazi creativ per investir daners. Gl’october 2024, cu la damonda da cumprar gl’areal Maissen ei vegnius concrets, haveva il president communal declarau en in discuors culla FMR: «Igl ei ina fetg buna caschun cun ina gronda cuntervalur». Ussa, il zercladur 2025, puntuescha Marcus Beer: «Quei ei il toc da filet dil marcau da Glion».