Movimento bainbod in muvimaint?

Daspö sia fundaziun l’an 1987 es l’instituziun Movimento – la societed sociela chi chüra persunas cun impedimaint a Samedan, Poschiavo ed a Scuol – già da chesa illas localiteds dal vegl ospidel a Samedan. In quistas localiteds as rechattan sün püs plauns traunter oter ün’ufficina, üna chadafö, locals per l’administraziun e partiziuns d’abiter per las persunas in chüra.

Il vegl ospidel a Samedan nun es be il lö principel da l’instituziun Movimento, ella fo uossa eir part, scu aunch’otras immobiglias, dal moratori da la SGO – la veglia organisaziun pel provedimaint da sandet, la quela es gnida rimplazzeda tres la Sanadura. Cul finel SCHI unanim a la Sanadura ho l’Engiadin’Ota principi da quist an bainschi pudieu sgürer l’existenza per sieu provedimaint da sandet, però che chi capita cul relasch da la SGO es actuelmaing aunch’aviert.

A chaschun da la radunanza generela da la societed Movimento in marculdi passo ho la FMR vulieu savair cu cha la situaziun in connex cul moratori e lur localiteds i’l vegl ospidel a Samedan as preschainta actuelmaing.

Lö a Samedan dess rester

Chi dvainta il nouv proprietari dal relasch da la SGO – chi cumpiglia diversas immobiglias, scu per exaimpel apunto l’ospidel vegl da Samedan – e che intents perseguitescha quist nouv proprietari in avegnir cun quistas immobiglias? Que sun dumandas actuelmaing auncha fich aviertas, però da grand’importanza per tuot ils fittadins da localiteds in possess da la SGO.

Da quista situaziun actuelmaing intscherta es pertucheda eir la societed Movimento. Schabain cha quista tematica es gnida discuteda cuortamaing düraunt lur radunanza generela (guarda box), nu vulessan ils respunsabels pel mumaint auncha s’exprimer memma ferm in chosa. A la dumanda scha l’instituziun vuless rester eir in avegnir illas localiteds actuelas respuonda la presidenta da la societed Movimento, Prisca Anand seguaintamaing: «Que es evidaint. Samedan es nos lö principel, inua cha nus vains tuot nossa administraziun. E s’inclegia cha nus vulains in mincha cas eir rester lo. Però que nu dependa be da nus.»

Credituors tuot tenor cun oters interess?

Manageda es la rolla da Jürg Girschweiler, il procuratur dal moratori (Sachwalter) da la SGO. El es uossa la persuna respunsabla in connex cun l’andamaint dal relasch da la SGO. Cha la Banca Chantunela Grischuna ed il Departamaint chantunel da finanzas sun ils pü grands credituors, nun es üngün secret. Taunt pü grand però es il secret, scha’ls tels surpiglian il relasch u bricha ubain che chi’d es insomma la strategia per il futur.

Uscheja fo Jürg Girschweiler a savair in scrit a la FMR cha la dumanda cu proseguir cullas immobiglias saja in elavuraziun ed agiundscha: «Il böt es da sgürer ed augmanter il meglder pussibel la valur da las immobiglias, per cha’ls credituors e las credituras possan gnir cuntantos il meglder pussibel i’l ram da la procedura. Actuelmaing gira la valütaziun da las immobiglias pertuchedas.»

Pünavaunt accentuescha il procuratur dal moratori in sia resposta eir chi gnian examinedas tuot las offertas ed opziuns avaunt maun. Cha decisiv saja però cha la soluziun cuntainta il meglder pussibel ils interess da las credituras e dals credituors.

Avegnir auncha intschert

Che cha que vuless dir concretamaing as po intaunt be speculer. Fat es – cu cha’l exaimpel da la societed Movimento muossa – cha lur contrat in dret da fabrica illas localiteds dal vegl ospidel a Samedan scada dal 2035 e cha zieva nu’s so u nu’s vuless pel mumaint auncha tradir che chi capita. «Natürelmaing cha que ans fo pissers e perque fain nus tuot il pussibel per chatter üna buna soluziun», managia Prisca Anand pünavaunt e conclüda il cuort discuors cun declarer cha’s stetta in contact cun tuot ils partieus invouts e ch’üna soluziun dess esser sün maisa uschè svelt scu pussibel düraunt il decuors dals prossems mais.

Scha que vuless dir üna cumprita da las localiteds ubain ün’otra cunvegna, eir cò as po que intaunt be speculer. Cha fin ch’üna soluziun definitiva saja avaunt maun restan las relaziuns da fit existentas sainza müdedas, scriva Jürg Girschweiler a la fin, e cha que vela eir per la societed Movimento.

Üna declaraziun dimena chi do ün pô sgürezza, in vista ad ün avegnir intaunt auncha intschert.