Per sport, divertiment e sentupada
Cun in grond ed attractiv center da sport e divertiment vul l’Andermatt Swiss Alps SA dar in ulteriur impuls alla visiun Andermatt. Il center da sport, previus gia el plan da master da 2008, vegn marcantamein pli gronds che planisau oriundamein. El duei daventar in liug multifar per sport, temps liber e sentupada per la populaziun, possessuras e possessurs da secundas habitaziuns e hosps. Proximamein duei la damonda da baghegiar vegnir inoltrada.
«Cul project d’in niev center da sport ad Andermatt vegn in’empermischun essenziala da Samih Sawiris ademplida», scriva l’Andermatt Swiss Alps SA en ina communicaziun allas medias. Sin giavisch oravontut dalla populaziun seigi il project vegnius adattaus. «Enstagl d’in sempel bogn cuvretg cun local da fitness dat ei ina purschida cumplessiva cun reiver, fitness, yoga, center da temps liber cun ustria, kids club, bowling, bogn da famiglia cun bogn ordaviert, pool da 25 m, spa, plazzas da padel sco era ina plazza da glatsch ordaviert e plazza d’events. La surfatscha da diever planisada ei vegnida engrondida d’oriundamein 2300 sin rodund 5000 meters quadrats», scriva la societad.
Plazza dil vitg sportiva
La zona da sport, nua ch’il niev center vegn realisaus, ei previda sco plazza dil vitg sportiva che colligia Andermatt Vitg ed Andermatt Reuss. Pliras ideas ord il ravugl dalla populaziun ein flessegiadas el svilup. Persuenter haveva la vischnaunca d’Andermatt fatg ina retscherca online ed in luvratori public. Leutier ei cunzun semussau in grond basegns per ina zona d’aua, fitness, wellness ed ina purschida d’indoor orientada allas famiglias. Medemamein ein ideas pil sport da reiver ed il divertiment sin glatsch vegnidas risguardadas.
Per indigens e hosps
«Nus havein buca vuliu secuntentar cun ina soluziun minimala, mobein crear enzatgei, dil qual nus savein veramein esser loschs. Jeu apprezieschel fetg che nus havein suenter in temps considerabel e lavur cumina ussa concepiu in center da sport variont e modern che porta il medem nez alla populaziun sco als hosps», di Samih Sawiris, president dil cussegl d’administraziun dall’Andermatt Swiss Alps SA. «Il svilup dalla zona da sport ei in tierm impurtont el svilup general d’Andermatt. Per nus va ei denton per dapli ch’in project – Andermatt ei nies dacasa. Perquei havein nus decidiu da cuntinuar cul svilup ed investir dapli el center da sport che previu», puntuescha Naguib S. Sawiris, commember dil cussegl d’administraziun dall’Andermatt Swiss Alps SA e president dil cussegl d’administraziun dall’Orascom Development Holding.
Cumpletar igl existent
Il niev center da sport cumpletescha la purschida existenta d’Andermatt cunzun sil sectur dallas activitads d’indoor, per famiglias e da malaura. La societad gestiunaria duei vegnir purtada communablamein dall’Andermatt Swiss Alps SA e dalla vischnaunca d’Andermatt e vegnir fundada il medem mument sco la damonda da baghegiar. «Sche tut va tenor plan vegn la damonda da baghegiar inoltrada alla vischnaunca las proximas jamnas. Las lavurs da construcziun duein entscheiver igl onn vegnent e l’avertura ei previda per 2032/33», scriva l’Andermatt Swiss Alps SA.
Gust da leger dapli?