Da plaschairs, Sontg’Antoni e grilladas

Surmiranas e Surmirans èn represchentads cun totalmain tschintg sezs en il parlament grischun. Mintgamai in sez è reservà per ils circuls Surses, Belfort e Bravuogn. Il circul Alvaschagn ch’è il pli grond dastga trametter dus deputads u duas deputadas «gio Coira».

Circul electoral Surses: «Dubel plaschair»

A las elecziuns 2022 èsi anc stà piz a cup: Fabio Luzio (PLD) aveva mo per paucas vuschs gudagnà il sez da Surses. Ussa, quatter onns pli tard èsi clera chaussa: L’electroinstallatur da Cunter politisescha vinavant. «Jau ma legr mega fitg che jau hai fatg uschè in bun resultat», ha ditg Fabio Luzio curt suenter ch’ils resultats èn vegnids enconuschents. El fa 570 vuschs – ed è cunquai cleramain elegì da Sursetras e Sursetters.

Per tschels candidats restan be mieulas. Adrian Ballat (PS) fa 141 vuschs, Marcel Züger (Center) 112 vuschs. Er il candidat Ignaz Netzer da la pli ferma partida dal Grischun, la PPS, n’ha betg gì schanzas cun 57 vuschs.

Per Fabio Luzio èsi quasi ina victoria dubla. Proximamain vegn el pli probabel elegì sco president dal Cussegl grond 2027 e daventa cunquai il pli aut Grischun. «Cler, in pau en la testa davostiers hai jau adina gì questa chaussa, uschia che jau vai uss era dubel plaschair.»

Circul electoral Alvaschagn:
«Dar colur oransch»

Mo paucs politichers e politicras èn stads uschè en il focus medial ils ultims onns sco el: Daniel Albertin (Center), president communal dad Albula/Alvra ed era enconuschent sco «Mister Brinzauls». Cun in resultat da parada da 746 vuschs è el vegnì elegì en il Cussegl grond per il circul d’Alvaschagn. Ed admetta, che «Brinzauls» haja er in pau gidà ad el. «Sco ch’i para èn votantas e votants adina stads cuntents cun la lavur ch’ins ha prestà enfin uss en vischnanca.»

El sa legra da «puspè ir giu Cuira». Gia ils onns 2010–2018 ha el politisà sin plaun chantunal. Da la politica n’haja el mai avunda: «Cler, la politica ma plascha natiralmain, ed jau hai era grond plaschair che jau hai ussa survegnì la schanza da pudair far quest pass.»

Er il segund sez dal circul Alvaschagn resta oransch. Luana Bergamin ha cuntanschì 577 vuschs e dastga politisar vinavant sin plaun chantunal. «Nus faschain in zichel festa, gea, igl è in bel resultat. Ed jau sun fitg engraziaivla che jau hai uschè in grond sustegn.» Ensemen cun ses collega da partida Daniel Albertin veglian els vinavant «dar in zichel ina colur oranscha a la politica a Cuira», ha la deputada actuala da Lai explitgà envers la FMR.

Sin plazza trais e quatter sa tschentan Leo Engler da la PLD cun 428 vuschs e Nico Züllig da la PLD cun 236 vuschs.

Circul electoral Belfort:
Sontg’Antoni ha gidà

Er il circul electoral Belfort – cun 623 abitants in dals pitschens circuls electorals dal Grischun – resta oransch. Daniel Ulber (Center) è vegnì elegì cleramain cun 172 vuschs. Ses concurrent da la PPS Walter Gruber fa mo 67 vuschs.

«Jau ma legr natiralmain da quest resultat, da l’auter maun hai jau era vesì che nossa partida perda in pèr sezs en il parlament», ha ditg il victur a la redacziun. «La glieud enconuscha mai ed jau sun schon daditg activ en vischnanca, era sco suprastant, uschia che hai jau plaschair da politisar vinavant  a Cuira.»

La dumengia saira suenter l’elecziun ha il deputà e pur stuì ir a sunar per la festa da Sontg’Antoni a Lantsch, el suna numnadamain en l’Uniun da musica Lantsch. «Uschia è la festa schon in pau programmada, ma cler, cun in bun resultat datti er ina pli bella festa», ha ditg il pur da Lantsch.

Circul electoral Bravuogn:
Ina grillada per il noviz

Cunquai ch’il «dinosaurier» politic Felix Schutz (PLD) ha suenter dudesch onns deputà decidì da terminar sia carriera politica, è il sez dal circul Bravugon vegnì liber. Il successur dad el è entant era commember da la PLD e sa cloma: Jürg Hanselmann. Cun 213 vuschs ha el gudagnà la cursa avant sia concurrenta Seraina Schutz (PS) che ha fatg 104 vuschs. Ed er avant ses concurrents Urs Fliri (Center) cun 58 vuschs e Martin Heiz (PPS) cun 31 vuschs che han rimnà vuschs per lur partidas.

«Jau festivesch mia elecziun cun ina pitschna grillada cun collegas e sun extrem cuntent che jau hai cuntanschì uschè in bun resultat», ha manegià il noviz deputà da Filisur. Tge che legria el spezialmain saja l’auta participaziun en ses cirquit. Sco administratur da finanzas veglia el cunzunt era «guardar ch’il Chantun va enturn bain cun ses daners, quai è impurtant per mai».

Schons resta en mauns dal Center

Malgrà victoria – «ina gronda festa na datti betg», declera Roman Hassler (Center) che sesa da nov per il circul electoral da Schons en il Cussegl grond. El remplazza Gian Michael che terminescha sia carriera politica suenter 16 onns.

In sulet sez ha il circul electoral Schons – cun las vischnancas Andeer, Ferrera, Muntogna da Schons, Runtgaglia e Zillis-Reischen –  dabun en il parlament grischun. Ils ultims 16 onns era quel «occupà» da Gian Michael (Center).

Era per ils proxims quatter onns resta quel sez cun Roman Hassler «oransch», la colur da la partida. Il pur da Donat ha cun 273 vuschs fatg la cursa avant Hans Andrea Fontana (PPS), 192 vuschs, e Gieri Christ Fravi (PLD) cun 156 vuschs. Rimnà vuschs per lur partidas han Elena Eigenheer (Verda) cun 58 vuschs e Susanne Iten-Röllin (PS) cun 66 vuschs.

«La glieud enconuscha mai»

Ses bun resultat declera il nov deputà da Schons Roman Hassler cun ils suandants pleds: «La differenza han a la fin cunzunt fatg las vuschs da la Muntogna da Schons, nua che la glieud enconuscha mai. E lura sun jau er en l’endretga partida, schegea, la PPS ha – sco dapertut – era qua augmentà sias vuschs.»

En la scola da Donat èn ils collegas che han sustegnì sia candidatura sa radunads la dumengia sin in pitschen viva. «I va cunzunt per dir engrazia fitg, ma uschiglio na sun jau segir era betg quel che dovra uss ina gronda festa.» (fmr/sb)